Ağcaqanadların hansı qan qrupuna malik insanları daha çox seçməsi ilə bağlı yayılmış fikirlər tam olaraq doğru deyil. Mütəxəssislərin sözlərinə görə, həşəratların insana marağını müəyyən edən əsas amil qan qrupu deyil, insanın yaydığı müxtəlif bioloji və kimyəvi siqnalların məcmusudur.
Avropa Tibb Mərkəzinin dermatoveneroloqu Anastasiya Ufimseva bildirib ki, qan qrupu müəyyən araşdırmalarda mümkün amil kimi nəzərdən keçirilsə də, bu, ağcaqanadların insanı seçməsində universal və həlledici göstərici hesab edilmir. Buna görə də “ağcaqanadlar konkret qan qrupunu sevir” fikri sadələşdirilmiş yanaşmadır.
Həkim qeyd edib ki, ağcaqanad dişləməsinə reaksiyanın gücü də insanın qan qrupu ilə bağlı deyil. Əsas rol orqanizmin həşəratın tüpürcəyinə verdiyi fərdi immun reaksiyaya məxsusdur. Bəzi insanlarda dişləmədən sonra böyük şişkinlik və qabarıqlıq yaranır, digərlərində isə yalnız kiçik qızartı müşahidə olunur.
Ağcaqanadlar insanı tapmaq üçün bir neçə siqnaldan istifadə edir. Məsafədən onları əsasən insanın nəfəs alarkən xaric etdiyi karbon qazı cəlb edir. Daha sonra həşəratlar bədən temperaturuna və istilik şüalanmasına istiqamətlənir. Dəriyə yaxınlaşdıqda isə tərin tərkibi, süd turşusu, ammonyak və dəri mikrobiomunun fəaliyyəti nəticəsində yaranan kimyəvi siqnallar mühüm rol oynayır.
Bəzi dərman preparatlarının da insanın ağcaqanadlar üçün cəlbediciliyinə təsir göstərə biləcəyi bildirilir. Preparatlar tərləməyə, dəri ifrazatlarının tərkibinə və maddələr mübadiləsinə təsir göstərməklə insanın yaydığı kimyəvi siqnalları dəyişə bilər.
Mütəxəssis bəzi təzyiqsalıcı preparatların və sidikqovucu dərmanların tərin tərkibinə və ya dəri mikrobiomuna təsir göstərərək ağcaqanadların qəbul etdiyi kimyəvi siqnalları dəyişə biləcəyini vurğulayıb.
Hormonal preparatlar, o cümlədən oral kontraseptivlər barədə də elmi ədəbiyyatda müəyyən əlaqələr müzakirə olunur. Lakin bu təsirin konkret preparatdan, dozasından və istifadə müddətindən asılı olaraq dəyişə biləcəyi qeyd edilir.
Bundan başqa, bəzi vitamin və qida əlavələri, kəskin qoxulu vasitələr, siqaret çəkmək, maddələr mübadiləsinin xüsusiyyətləri, bədən temperaturu və tərləmə səviyyəsi də ağcaqanadların insana marağına təsir göstərə bilər.
Mütəxəssislər ağcaqanad dişləmələrindən qorunmaq üçün dərmanların özbaşına dayandırılmasını məsləhət görmür. Ən etibarlı üsullar repelentlərdən istifadə etmək, bədəni örtən geyimlər geyinmək, suyun toplanması üçün əlverişli yerləri aradan qaldırmaq və ağcaqanadların dəri ilə təmasını minimuma endirməkdir.