Azərbaycan televiziyasının və radiosunun qocaman diktoru, Xalq artisti, Prezident təqaüdçüsü Ofeliya Sənaninin 85 yaşı tamam olub.

Urbaninfo.az nocomment-ə istinadla xəbər verir ki, yubiley münasibətilə paytaxt Bakıda təntənəli tədbir təşkil edilib.

Bakı restoranlarının birində keçirilən yubiley tədbirinə Azərbaycan Televiziyasının (AzTV) tanınmış simaları, həmçinin ölkənin məşhur diktorları qatılaraq sənətkarı əlamətdar gün münasibətilə təbrik ediblər.

Ofeliya Hacağa qızı Sənani 1941-ci il mayın 26-da Bakı şəhərində anadan olub. Hələ məktəb illərindən sənətə və efir mühitinə böyük maraq göstərən Ofeliya xanım, 1959-cu ildə — 10-cu sinifdə oxuyarkən Respublika Radiosunda təcrübəçi diktor kimi fəaliyyətə başlayıb. Paralel olaraq Bakı Dövlət Universitetinin filologiya fakültəsinin axşam şöbəsində ali təhsil alıb. O, 1959–1975-ci illərdə müxtəlif radio tamaşalarında baş rolları səsləndirərək qısa zamanda dinləyicilərin rəğbətini və sevgisini qazanıb.

Azərbaycan milli televiziyasının və radiosunun inkişafındakı əvəzsiz xidmətlərinə görə Ofeliya Sənani 1975-ci ildə "Əməkdar artist", 1991-ci ildə isə "Xalq artisti" fəxri adlarına layiq görülüb. Görkəmli diktora 1994-cü ildə Azərbaycan Respublikası Prezidentinin Sərəncamı ilə fərdi təqaüd təyin edilib.

“Əgər kvorum məsələsinin hüquqi tərəfi həll olunmasa, səsvermə nizamnaməyə uyğun keçirilmiş hesab edilə bilməz”.

Urbaninfo.az xəbər verir ki, bunu Əli İsa Cabbarov Azərbaycan Kinematoqrafçılar İttifaqının konfransında çıxışı zamanı deyib.

Cabbarov bildirib ki, konfransdan əvvəlki proseslərdə imza verən bəzi üzvlərin sonradan imzalarını geri götürməsi halları qeydə alınıb. Onun sözlərinə görə, ümumilikdə 10 nəfər imzasını geri çəkib.

O qeyd edib ki, bəzi üzvlərə müxtəlif səbəblərlə tədbirə qatılmamaqla bağlı müraciətlər edildiyi barədə məlumatlar mövcuddur. Cabbarov vurğulayıb ki, bu kimi hallar konfransın legitimliyi baxımından ciddi şəkildə müzakirə olunmalıdır.

“Üzvlərin sayı 460 nəfərdir və kvorum 230 nəfər təşkil edir. Lakin obyektiv və subyektiv səbəblərə görə bu sayın təmin olunmadığı görünür”, – deyə o əlavə edib.

Əli İsa Cabbarov həmçinin qeyd edib ki, ittifaqla bağlı yayılan bəzi məlumatlar həqiqəti əks etdirmir. Onun sözlərinə görə, ittifaqın möhürü ilə bağlı iddialar doğru deyil və bütün sənədlər mühasibatlıqda saxlanılır:

“Açıq şəkildə bildirirəm ki, bunlar Şəfiqə Məmmədova və Vaqif Mustafayevin addımlarıdır. Mən başa düşə bilmirəm ki, bu gün bura niyə gəlməyiblər”.

O əlavə edib ki, Azərbaycan Respublikası Hesablama Palatası tərəfindən aparılan proses audit xarakteri daşımır, bu, üzvlərin müraciəti əsasında ilkin sənədlərlə tanışlıq mərhələsidir.

Sonda Cabbarov vurğulayıb ki, kvorum məsələsi tam hüquqi şəkildə həll olunmadan səsvermənin keçirilməsi mümkün deyil və bu istiqamətdə müzakirələr davam etdirilir.

Londonda görkəmli xeyriyyəçi Hacı Zeynalabdin Tağıyevin həyat və fəaliyyətindən bəhs edən "Tağıyev: Neft" bədii filminin təqdimatı olub.

Urbaninfo.az xəbər verir ki, Londonun mərkəzində yerləşən Britaniya Film və Televiziya Sənətləri Akademiyasının (BAFTA) möhtəşəm "Princess Anne Theatre" zalında keçirilən təqdimatda Bakı Media Mərkəzinin rəhbəri və filmin baş prodüseri Arzu Əliyeva, prodüser Orman Əliyev, rejissor Zaur Qasımlı, Xalq artisti Pərviz Məmmədrzayev, Gürcüstan, Türkiyə, Özbəkistan və digər dövlətlərin səfirləri və diplomatik korpusun digər çoxsaylı nümayəndələri, Britaniya Xarici İşlər Nazirliyinin əməkdaşları, Britaniya parlamentinin Lordlar Palatasının üzvləri, "City of London", Millətlər Birliyi, Avropa Yenidənqurma və İnkişaf Bankı və sair təşkilatların nümayəndələri, bp şirkətinin təmsilçiləri, ictimai-siyasi xadimlər, Britaniyada yaşayan Azərbaycan icmasının üzvləri iştirak ediblər.

Film Heydər Əliyev Fondu, Mədəniyyət Nazirliyi və Azərbaycan Respublikasının Kino Agentliyinin dəstəyi, "Neqsol Holding", "Kapital Bank", "Bakcell" və "Norm" şirkətlərinin sponsorluğu ilə Bakı Media Mərkəzi tərəfindən istehsal olunub. Ekran əsəri "Tağıyev" çoxseriyalı layihəsinin birinci hissəsidir. Filmdə XIX əsrin sonları-XX əsrin əvvəllərində Bakıda neft bumu kontekstində Hacı Zeynalabdin Tağıyevin sadə bənnadan nüfuzlu neft sənayeçisinə qədər uzanan həyat yolu təsvir olunur.

Tədbirdə çıxış edən Azərbaycanın Böyük Britaniyadakı səfiri Elin Süleymanov Hacı Zeynalabdin Tağıyevin Azərbaycanın iqtisadi və mədəni həyatında oynadığı mühüm roldan bəhs edib, bu yolda üzləşdiyi çətinliklər və keçdiyi sınaqların onu öz yolundan döndərmədiyini söyləyib. Səfir Tağıyevin ən böyük arzularından birinin təhsilin inkişafı və müsəlman Şərqində ilk dünyəvi qızlar məktəbinin yaradılması olduğunu xüsusi vurğulayıb.

Tarixin müxtəlif dövrlərində Azərbaycan xalqının həyatında mühüm rol oynamış görkəmli şəxsiyyətlərin olduğuna diqqət çəkən səfir Elin Süleymanov bir neçə gün əvvəl Ümummilli Lider Heydər Əliyevin anadan olmasının 103-cü ildönümünün qeyd olunmasından, Ulu Öndərin ötən əsrin sonlarına yaxın Azərbaycanın ağır böhranlardan çıxaraq sabit inkişaf yoluna qədəm qoymasında həlledici və əvəzolunmaz rolundan danışıb.

Filmin Londondakı təqdimat mərasimində iştirak edən qonaqlar ekran əsəri barədə xoş təəssüratlarını bölüşüblər. Onlar layihəni yüksək keyfiyyətdə ərsəyə gətirən Bakı Media Mərkəzinin yaradıcı komandasını ürəkdən alqışlayaraq filmin Azərbaycan və onun tarixi, mədəniyyəti, dəyərləri, inkişaf yolu haqqında olduqca maraqlı məlumatlar ötürdüyünü bildiriblər. Qonaqlar bu kimi layihələrin Azərbaycanın dünyaya tanıdılmasında böyük rola malik olduğunu, Hacı Zeynalabdin Tağıyevin əslində Azərbaycan xalqına məxsus humanistlik, xeyirxahlıq, səxavətlilik, dözümlülük, mərdlik kimi xüsusiyyətləri özündə birləşdirdiyini vurğulayıblar.

Xalq artisti Pərviz Məmmədrzayev filmin Rusiyada və ABŞ-nin Los-Anceles şəhərində nümayişindən sonra Londonda təqdimatının keçirilməsinin sevindirici olduğunu bildirib. Onun sözlərinə görə, film auditoriya tərəfindən böyük maraqla qarşılanıb və yaradıcı heyət çoxsaylı təbriklər alıb.

Bakıda motosiklet yerüstü piyada keçidinə çırpılması nəticəsində sürücü ölüb.

Bu barədə Urbaninfo.az-a Baş Dövlət Yol Polisi İdarəsindən məlumat verilib.

Bildirilib ki, mayın 10-u saat 06:05 radələrində paytaxtın Xətai rayonu ərazisində motosikletçinin ölümü ilə nəticələnən yol qəzası qeydə alınıb.

Belə ki, 8 Noyabr prospektində hərəkətdə olan 99 M 279 nömrəli motosiklet yoldan çıxaraq yerüstü piyada keçidinin dayaq konstruksiyasına çırpılıb.

Yüksək sürət səbəbindən baş verməsi ehtimal olunan ağır yol-nəqliyyat hadisəsi nəticəsində Bakı şəhər sakini, 26 yaşlı Raul İsgəndərov hadisə yerində ölüb.. Faktla bağlı cinayət işi açılıb, araşdırma aparılır.

Məşhur türkiyəli müğənni İbrahim Tatlısesin kiçik qardaşı Hüseyn Tatlı onun haqqında ağır ittihamlar irəli sürüb.

Urbaninfo.az Türkiyə mətbuatına istinadən xəbər verir ki, H. Tatlı artıq “bıçağın sümüyə dayandığını” bildirərək hər şeyi danışacağını deyib.

O, indiyədək kimsənin onun yolunu açmadığını, əksinə, sənət fəaliyyətinə mane olduqlarını iddia edib:

“Kimsə elə bilməsin ki, susmağım qorxaqlığımdandır, sadəcə əfəndiliyimdən susurdum. Amma artıq bəsdir. Mən İbrahim Tatlısesin öz qardaşıyam, Hüseyn Tatlıyam. Hər kəs həddini bilməlidir”.

O, qardaşı İbrahim Tatlıses haqqında da kəskin ifadələr işlədib:

“İbrahim Tatlıses mənim böyük qardaşımdır, canımdır, amma o da mənim yolumu kəsib. Mənim sənət həyatımı bitirmək üçün əlindən gələni edib. İndi çıxıb televiziyalarda mənə dəstək olduqlarını deyirlər. Yalandır, tamamilə yalandır. Artıq susmayacağam, hər şeyi bir-bir danışacağam”.

Qeyd edək ki, H. Tatlının sözügedən açıqlamaları Türkiyə şou-biznesində böyük rezonans doğurub. İ. Tatlıses tərəfindən hələlik bu ittihamlara rəsmi reaksiya verilməyib./Qafqazinfo

Heydər Əliyev Mərkəzində mayın 2-də Ulu Öndər Heydər Əliyevin anadan olmasının 103-cü ildönümü ərəfəsində "İz" sənədli filminin nümayişi olub.

Urbaninfo.az xəbər verir ki, Heydər Əliyev Fondu tərəfindən təqdim edilən filmdə Ulu Öndərin həyat və fəaliyyətindən bəhs olunur.

Filmin süjet xətti Ümummilli Lider Heydər Əliyevin çıxışları, müsahibələri əsasında onun həyatının və siyasi fəaliyyətinin müxtəlif dövrlərini əhatə edir.

Filmdə Ümummilli Liderin Azərbaycana və xalqa bağlılığı, Azərbaycanın müstəqil dövlət kimi qüdrətlənməsi, Qarabağın işğaldan azad edilməsi istiqamətində apardığı ardıcıl siyasət əksini tapıb. Eyni zamanda, 30 illik işğaldan sonra torpaqlarımızın Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə azad olunması, ərazi bütövlüyümüzün bərpa edilməsi, bununla da Ümummilli Lider Heydər Əliyevin vəsiyyətinin və arzularının reallaşması da filmdə yer alıb.