Müğənni Alla Puqaçova ictimaiyyət qarşısına əsayla çıxıb. Sənətçinin bu halda çəkilmiş fotosu onun pərəstişkarlarından biri tərəfindən sosial şəbəkədə paylaşılıb.
Şəkildə Puqaçova həyat yoldaşı, komediyaçı Maksim Qalkin ilə birlikdə görüntülənib. Fotoda o, sağ əli ilə əsaya söykənmiş vəziyyətdədir.
Martın 12-də Puqaçovanın direktoru Yelena Çuprakova “Gazeta.Ru”ya açıqlamasında müğənninin aprel ayında məhkəmə iclasında iştirak etmək üçün Rusiyaya mümkün səfəri ilə bağlı şərh verməkdən imtina edib. Məhkəmə işi Federal Təhlükəsizlik və Korrupsiyaya Qarşı Mübarizə Layihəsinin rəhbəri Vitaliy Borodin tərəfindən qaldırılmış iddia ilə bağlıdır.
Borodinin Puqaçovaya qarşı iddiası üzrə ilk məhkəmə iclası martın 10-da keçirilib. Onun sözlərinə görə, o, sənətçinin nümayəndəsi ilə danışıb və söhbət sakit şəraitdə keçib. Borodin məhkəmə prosesinin açıq keçirilməsini və Puqaçovanın Rusiyaya gəlməsini tələb edib. O bildirib ki, müğənninin hüquqşünası bu sözləri ona çatdıracağını vəd edib.
Federal layihənin rəhbəri müğənnidən 5 milyon rubl təzminat tələb edir. Lakin o, bu məbləğin tam şəkildə alınmasının çətin olduğunu da qeyd edib.
Rusiyanın Ukraynada hərbi əməliyyatlara başlamasından sonra Puqaçova həyat yoldaşı Qalkin və uşaqları ilə birlikdə Rusiyadan İsrailə köçüb. Hazırda məşhurlar müxtəlif ölkələrə səyahət edirlər. Onlar Latviya və Fransada da görülüblər, lakin əsas yaşayış yerləri İsraildir. Uşaqları burada özəl gimnaziyada təhsil alır. Cütlüyün İsrail pasportu və həmçinin Kipr vətəndaşlığı var.

Urbaninfo.az