Aktrisa serialın yeni mövsümündə rol alacağını düşündüyünü açıqlayıb

“Kızılcık Şerbeti” serialında dörd mövsüm Nursema obrazına həyat verən Ceren Karakoç layihədən ayrılması barədə danışıb.

Türkiyəli aktrisa Ayşe Armanın “Sahici” proqramında qonaq olarkən obrazının serialdakı sonu ilə bağlı sualları cavablandırıb.

Karakoç Nursemanın taleyi barədə “Hər şeyin bir sonu var. Sadəcə deyək ki, Nursema üçün son belə idi” söyləyib. Personajın qəzada öləcəyindən əvvəlcədən məlumatlı olub-olmadığı barədə suala isə mənfi cavab verib.

Aktrisanın sözlərinə görə, yeni mövsüm ərəfəsində prodüserlə görüşüb və serialda qalmaq barədə razılığa gəlib. Görüş zamanı ona fəaliyyətin davam edəcəyi bildirilib və tərəflər avqustda yenidən görüşmək barədə razılaşıblar.

Lakin Karakoç tətildə olduğu zaman istehsal qrupundan telefon zəngi alıb. Aktrisa həmin zəngin səbəbsiz olmadığını düşündüyünü bildirib.

Xatırladaq ki, Ceren Karakoçun “Kızılcık Şerbeti”ndən ayrılması avqust ayında rəsmən açıqlanıb. Onun sosial şəbəkədə paylaşdığı “Bəzən həyat bizə planlaşdırdığımız deyil, bizim üçün seçilmiş vidaları gətirir” sözləri də diqqət çəkib.