Xalq artisti Alim Qasımov müğənni Üzeyir Mehdizadə ilə ifa etdiyi “Nəyindən narahatsan” duetinə münasibət bildirib.

“Kulis”ə müsahibəsində danışan sənətçi mahnının sözlərini və musiqisini bəyəndiyini deyib.

“Üzeyir Mehdizadə bir mahnı var, musiqisini yazanda səni düşünmüşəm, dedi. Əsas da mahnının sözləri ürəyimə yatdı”, - Alim Qasımov bildirib.

Xalq artisti duetə olan reaksiyanın belə olacağını əvvəlcədən təxmin etdiyini söyləyib.

“Üzeyirlə duetimizin belə qarşılanacağını təxmin edirdim, amma bu qədər olacağını gözləmirdim. Ancaq bu da bir yenilikdir. Kim tənqid edir, özü bilər”, - deyə o qeyd edib.

Alim Qasımov Montrö festivalında iştirakını da xatırladıb. O, tədbirin yüksək səviyyədə təşkil edildiyini və tamaşaçıların konsertə maraq göstərdiyini bildirib.

Sənətçi televiziya proqramlarında əvvəlki qədər görünməməsinin səbəblərindən danışarkən musiqiçilərin əməyinin və sənətinin qiymətləndirilməsinin vacibliyini vurğulayıb.

O, rep ifaçısı ilə birgə hazırladığı layihəyə dair tənqidlərə də münasibət bildirib. Alim Qasımov fərqli musiqi üslublarının bir araya gəlməsini normal hesab etdiyini deyib.

Xalq artisti gələcəkdə də uyğun layihələrdə iştirak edə biləcəyini vurğulayıb.

“Yaxşı musiqidirsə, yaxşı təklifdirsə, mənim ürəyimə yatırsa, mənə elə gəlir ki, tamaşaçının da ürəyinə yatacaq. Birinci dəfə bəlkə bir az yatmaz, amma qulaq asdıqca alışacaq”, - o əlavə edib.

Alim Qasımov yeni təklif və ideyalarının olduğunu da bildirib.