Həmidə Ömərova AKİ seçkisində ona söz verilmədiyini açıqladı
Azərbaycan Kinematoqrafçılar İttifaqının sədrliyinə namizəd olan Xalq artisti Həmidə Ömərova seçki prosesində çıxışına imkan yaradılmadığını açıqlayıb.
Sənətçi “APA TV”yə açıqlamasında müstəqil platformanın nümayəndəsi kimi fikirlərini bölüşəcəyinə ümid etdiyini qeyd edib.
Onun sözlərinə görə, nə özünə, nə də onun adından danışmaq istəyən şəxslərə söz verilib.
“Əgər kinematoqrafçıların bir qismi kiminsə namizədliyini irəli sürürlərsə, onu da dinləmək lazım idi. Heyif ki, mən öz fikrimi deyə bilmədim, buna imkan verilmədi”, – deyə xalq artisti bildirib.
Həmidə Ömərova əlavə edib ki, bütün bunlara baxmayaraq, Kinematoqrafçılar İttifaqının inkişafına bundan sonra da dəstək göstərəcək.
Qeyd edək ki, Azərbaycan Kinematoqrafçılar İttifaqının ötən gün keçirilən konfransında Xalq artisti Şəfiqə Məmmədova sədr seçilib. Həmidə Ömərova da bu vəzifəyə namizəd olub.
