Dünyanın ən məşhur orta əsr sənət nümunələrindən biri hesab olunan Bayeux xalçası uzun fasilədən sonra İngiltərədə sərgilənməyə başlayıb.

Böyük Britaniya ilə Fransa arasında əldə edilmiş razılaşmaya əsasən, təxminən 1000 il əvvəl toxunan 70 metrlik xalça 2026-cı ilin sentyabrından 2027-ci ilin iyuluna qədər Britaniya Muzeyində nümayiş etdiriləcək.

Tarixi eksponatın təqdim olunduğu sərgini Böyük Britaniya Kralı III Çarlz və Kraliça Kamilla, Fransa Prezidenti Emmanuel Makron və Brijit Makron, eləcə də digər rəsmi şəxslər ziyarət ediblər.

Bayeux xalçası 1066-cı ildə baş verən və Normandiya hersoqu Vilhelmin İngiltərəni fəth etməsi ilə nəticələnən hadisələri təsvir edir. Xalçada XI əsr İngiltərəsinin hərbi həyatı ilə yanaşı, insanların gündəlik yaşamına dair müxtəlif detallara da yer verilib.

Mütəxəssislər əsərin Normand sifarişi ilə Kenterberi əlyazmaları əsasında ingilis toxucuları tərəfindən hazırlandığını ehtimal edirlər.