Çin istehsalçıları robot texnologiyasında əsas istehsal mərhələlərini avtomatlaşdırmağa başlayıblar. South China Morning Post-un məlumatına görə, Çin şirkəti Eyou Robot Technology insanabənzər robotlar üçün şarnirli birləşmələrin tam avtomatlaşdırılmış istehsal xəttini açıb.
Keçən həftə Şanxayda istifadəyə verilən zavod ildə 100 minədək komponent istehsalına hesablanıb və gələcəkdə istehsal gücünün üç dəfə artırılması planlaşdırılır.
2018-ci ildə təsis edilən Eyou Robot Technology bir sıra Çin humanoid robot istehsalçılarına, o cümlədən AgiBot şirkətinə komponentlər təqdim edir. Şirkət 2023-cü ildən serya istehsalına başlayıb və ötən il tədarük həcmi 95 min ədəddən çox olub.
Şirkətin qiymətləndirməsinə görə, tam avtomatlaşdırılmış montaj prosesi insanabənzər robotların maya dəyərini azaldacaq, istehsalın məhsuldarlığını artıracaq və keyfiyyətin sabitliyini təmin edəcək. İstehsal dövründə robotlardan istifadə 24/7 işləməyə imkan verir və işçi xərclərini yalnız planlı texniki xidmətlərlə məhdudlaşdırır.
Çin robot texnologiyası sahəsinin nümayəndələri qeyd edirlər ki, bu sahənin inkişafı avtomobil sənayesindən əhəmiyyətli dərəcədə fərqlənəcək. Robot texnologiyasında əsas texnoloji problemlər həll olunduqca tələb kəskin artacaq, bu da istehsal gücünün sürətlə genişlənməsinə və qiymətlərin daha tez düşməsinə səbəb ola bilər.