Qırğızıstanda Araşan ətlik-piylik cinsinə aid qoç 1 milyon dollara alınıb.

Xarici mətbuata istinadən xəbər verir ki, satışa çıxarılan heyvan 2023-cü ildə Qazaxıstanda 150 min dollara alınmış Frankel adlı qoçun nəslindən olub.

Qırğızıstan Kənd Təsərrüfatı Nazirliyinin məlumatına görə, rekord qiymətə satış Rusiya, Qırğızıstan, Qazaxıstan, Özbəkistan və Tacikistandan olan fermerlərin iştirak etdiyi beynəlxalq festival çərçivəsində baş tutub.

Qeyd edək ki, Araşan cinsi 2021-ci ildə Qırğızıstanda rəsmi qeydiyyata alınıb. Cinsin yaradılması istiqamətində işlər 1970-ci illərdən başlayıb. Bu məqsədlə Tacikistandan gətirilən Hissar qoçlarından və yerli qaba yunlu qoyunlardan istifadə olunub.

Araşan cinsindən olan heyvanlar keyfiyyətli və şirəli əti, eləcə də quyruq piyinin çox olması ilə seçilir. Bu cins yüksək dağlıq ərazilərdə və düzən çöl şəraitində saxlanmağa uyğunlaşdırılıb. Qoyunlar dözümlü olması ilə yanaşı, həm uzun müddət otlaqlarda, həm də tövlə şəraitində bəslənə bilir.