ABŞ-də 84 yaşlı Prisilla Slek qeyri-adi problemlə üzləşib. Dövlət sistemində səhvən ölü kimi qeyd edilən qadın artıq iki ildən çoxdur ki, sağ olduğunu sübut etməyə çalışır.

“Daily Mirror” yazır ki, hadisə Slekın həyat yoldaşının vəfatından sonra başlayıb. Naməlum texniki səhv nəticəsində məlumat bazalarında qadının da əri ilə birlikdə öldüyü göstərilib.

Bundan sonra onun bank hesabı dondurulub, kredit kartı bağlanıb. Seçkilərdə səs vermək istəyən Slek isə seçici siyahısında ölmüş şəxs kimi göründüyü üçün bu hüququndan istifadə edə bilməyib.

Qadın problemin ABŞ Sosial Təminat İdarəsinin sistemində yarandığını bildirir. Onun sözlərinə görə, səhvin düzəldildiyi deyilsə də, digər qurumlar hələ də onu vəfat etmiş şəxs hesab edir.

Problemlər bununla da yekunlaşmayıb. Slek ABŞ Vergi Xidmətindən aldığı məktubda onun vəfat etmiş şəxsə aid sosial sığorta nömrəsindən istifadə etdiyi barədə məlumatla qarşılaşıb.

84 yaşlı qadın hazırda dövlət qurumları arasında uzun mübarizə apararaq özünün sağ olduğunu və sənədlərinin düzgünlüyünü təsdiqlətməyə çalışır.

Vergi Xidməti məsələni araşdırmaq üçün xüsusi bölməyə göndərildiyini bildirib.