Şahzadə Diananın tarixə “qisas paltarı” kimi düşən məşhur geyimi qarşıdakı aylarda hərraca çıxarılacaq.

“Metro” yazır ki, 1994-cü ildə böyük diqqət çəkən paltar dekabr ayında “Sotheby’s” hərracında satışa təqdim olunacaq. Kristin Stambolianın hazırladığı, ürək formalı kəsiyi ilə seçilən geyimin ilkin dəyəri 110-220 min funt sterlinq, yəni təxminən 253-506 min manat müəyyənləşdirilib.

Satışdan əldə ediləcək gəlirin müəyyən hissəsi “NHS Lothian Charity” xeyriyyə təşkilatına yönəldiləcək. Vəsait Kral Edinburq Xəstəxanasında əlavə qulluq xidmətləri, tibbi avadanlıqlar və müxtəlif layihələrin maliyyələşdirilməsinə sərf olunacaq.

Hərracda paltarla birlikdə Diana və onun dizayneri Kristin Stambolianın imzasını daşıyan kataloq nüsxəsi də satılacaq.

Şahzadə Diananın bu geyimi 1994-cü ildə bir tədbirdə nümayiş etdirməsi geniş əks-səda doğurmuşdu. Həmin dövrdə Şahzadə Çarlz Kamilla Parker-Boulzla uzunmüddətli münasibətini açıq şəkildə etiraf etmişdi.

Diananın stilisti Enn Harvi daha sonra bildirib ki, şahzadə həmin gecə fərqli və xüsusi görünmək istəyib və buna görə paltarı son anda seçib.