Polşanın Varşava şəhərində Rəqəmsal Texnologiyalar Nazirliyinin qarşısında robotların iştirakı ilə etiraz aksiyası keçirilib.

Xarici KİV-in məlumatına görə, aksiyada humanoid, dördayaqlı və müxtəlif xidmət robotları iştirak edib.

“Demokratizm” təşəbbüsü tərəfindən təşkil olunan aksiyada robotlar bayraqlarla birlikdə “İş yerlərini qoruyaq” və “Tənzimləmə üçün vaxt yetişdi” şüarlarını nümayiş etdiriblər.

Təşkilatçılar bununla süni intellekt və robot texnologiyalarının əmək bazarına təsiri məsələsini gündəmə gətiriblər.

Aksiyanın təşkilatçısı Ceqoj Kulisin qeyd edib ki, humanoid robotların inkişafı ənənəvi olaraq insan əməyinə əsaslanan iş yerlərinin gələcəyi ilə bağlı narahatlıqları artırır. Onun sözlərinə görə, süni intellekt artıq məlumatların emalı, ofis və xidmət sahələrində daha geniş tətbiq olunur.

Rəqəmsal inkişaf naziri Kşiştof Qavkovski aksiya zamanı təşkilatçılarla görüşüb. O, süni intellektin və avtomatlaşdırmanın, xüsusilə humanoid robotlarla birlikdə nəzarətsiz inkişafının əmək bazarı və cəmiyyət üçün yeni çağırışlar yarada biləcəyini vurğulayıb.