Almaniyanın Yohann Gutenberg Universiteti (Maynts) və Erlangen-Nürnberg Universitetinin alimləri müəyyən ediblər ki, qısa müddətə smartfondan uzaqlaşmaq insanın əhval-ruhiyyəsini və enerjisini mülayim artırır. Tədqiqatın nəticələri Communication Research (CR) jurnalında dərc olunub.
Araşdırmada məqsəd, iştirakçıların təbii şəkildə, məcbur edilmədən digital mediadan “uzaqlaşmasının” onlara təsirini öyrənmək olub. Əvvəlki işlərdə sosial şəbəkələrdən və ya smartfondan tam imtina tələb olunurdusa, bu tədqiqat daha çox gündəlik vərdişlərin müşahidəsi üzərində qurulub.
Təcrübədə 18–35 yaşlı 237 könüllü iştirak edib. Onlar iki həftə ərzində gün ərzində bir neçə dəfə digital cihazlardan istifadə edib-etmədiklərini, cihazlarını bilərəkdən kənara qoyub-qoymadıqlarını və bu zaman hiss etdikləri əhval-ruhiyyə, enerji və stress səviyyəsini qeyd ediblər. Araşdırmada 12 mindən çox həyat situasiyası təhlil olunub.
Nəticələr göstərib ki, iştirakçılar cihazlarını daha çox kənara qoyduqda, bildirişləri söndürdükdə və ya aviarejimə keçdikdə özlərini bir qədər daha enerjili və sosial baxımdan daha aktiv hiss ediblər. Lakin bu müsbət dəyişikliklər iki-üç saat sonra yoxa çıxıb. Eyni zamanda, tədqiqat digital detoks və stress azalması arasında birbaşa əlaqə tapmayıb.
Alimlər qeyd edirlər ki, iştirakçılar nadir hallarda tam bütün cihazlardan uzaqlaşırdılar. Əksər hallarda insanlar sadəcə smartfonu kənara qoyur, amma noutbukdan istifadə etməyə davam edirdilər. Yəni digital fasilə və mediadan istifadə tez-tez paralel gedir.
Tədqiqatın ən vacib nəticəsi isə motivasiya ilə bağlıdır: smartfonu öz iradəsi ilə bir müddət kənara qoyanlarda əhval-ruhiyyədə artım daha aydın olub, lakin əgər bu, xarici məcburiyyət və ya qaydalarla edilibsə, bəzi hallarda əhval-ruhiyyə hətta pisləşə bilər.
Alimlər vurğulayırlar ki, “telefonu az istifadə et” kimi universal tövsiyələr hər zaman işləməyə bilər. İnsanların digital texnologiyalardan istifadədə şəxsi nəzarət və azadlıq hissi əslində onların rifahına daha çox təsir göstərir.

Urbaninfo.az