Pekində robotların öyrədilməsi üçün qeyri-adi “uşaq bağçası” yaradılıb. Burada alimlər robotların təliminə ənənəvi yanaşmadan fərqli üsulu sınaqdan keçirirlər. Bu barədə Çinin Global Times nəşri məlumat yayıb.

Məlumata görə, yeni yanaşmanın əsas xüsusiyyəti robotların insanlara nümayiş etdirilən hərəkətləri təkrarlamaqla deyil, toxunma, sınaq və səhvlər, eləcə də şəxsi təcrübə vasitəsilə öyrənməsidir.

Məsələn, robot yeriməyi öyrənərkən divara çırpılarsa, bu toqquşma onun təlim prosesinin bir hissəsinə çevrilir. Robot baş verən hadisəni qeydə alır, hərəkətlərini düzəldərək yenidən cəhd edir və eyni səhvi təkrarlamamağa çalışır. Beləliklə, uğursuzluğun özü robot üçün öyrənmə məlumatına çevrilir.

Alimlərin fikrincə, davamlı öyrənmə robotlara istismara verildikdən sonra da ətraf mühitə uyğunlaşmağa imkan verə bilər. Bu yanaşma sayəsində robotlar ilkin təlim zamanı qarşılaşmadıqları situasiyalara da uyğunlaşa biləcəklər.

Robotların təlimi üçün yaradılan mərkəz toxunma sensorları üzrə ixtisaslaşan Çin şirkəti Tashan Technology və süni intellekt sahəsində tanınmış kanadalı kompüter alimi Riçard Sattonun rəhbərlik etdiyi komandanın birgə səyləri nəticəsində yaradılıb.

Mütəxəssislər hesab edirlər ki, bu yanaşma gələcəkdə robotların daha müstəqil qərar verməsinə, real mühitdə qarşılaşdıqları problemlərdən nəticə çıxarmasına və fəaliyyətlərini fasiləsiz şəkildə təkmilləşdirməsinə imkan yarada bilər.