Çin alimlərinin apardığı yeni tədqiqat göstərir ki, qəhvə və çayın mülayim istehlakı ağciyər xərçəngi riskinin azalması ilə əlaqəli ola bilər. Araşdırma Puyan Şəhər Xəstəxanası və Şençjen Universiteti tərəfindən həyata keçirilib və nəticələr Frontiers in Nutrition jurnalında dərc olunub.
Tədqiqatçılar UK Biobank layihəsinin 276 mindən çox iştirakçısının məlumatlarını orta hesabla 13 ildən çox müddət ərzində izləyiblər. Bu dövr ərzində 3 821 nəfərdə ağciyər xərçəngi diaqnozu qoyulub. Alimlər xəstəliyin baş verməsi ilə qəhvə və çay içmə vərdişlərini müqayisə edərək, həyat tərzi, siqaret çəkilməsi və digər risk faktorlarını da nəzərə alıblar.
Analiz nəticəsində məlum olub ki, qəhvə və çayın təsiri qeyri-xətti formada özünü göstərir. Gündə yarım ilə 2–3 fincan qəhvə içən iştirakçılar arasında xərçəng halları, qəhvə içməyənlərlə müqayisədə daha az olub. Çay içənlərdə də oxşar nəticə müşahidə olunub: gündə 1–3 fincan çay içənlərdə xəstəliyin riski ən aşağı səviyyədə olub. Daha çox içmək isə əlavə qoruyucu effekt yaratmayıb.
Alimlər qeyd edirlər ki, bu təsir qəhvə və çayda olan bioloji aktiv maddələrlə bağlı ola bilər. Buraya antioksidantlar, polifenollar və flavonoidlər daxildir ki, bunlar hüceyrələrdə əmələ gələn reaktiv oksigen formalarını (ROS) neytrallaşdıraraq zərərli təsirləri azaldır.
Bununla belə, tədqiqatın müşahidə xarakterli olduğunu və birbaşa səbəb-nəticə əlaqəsini sübut etmədiyini vurğulayan alimlər əlavə araşdırmaların aparılmasının vacibliyini qeyd ediblər.

Urbaninfo.az