Yanvar ayında astronomlar tərəfindən kəşf edilən yeni kometanın 4 aprel tarixində Günəşə düşərək məhv olacağı proqnozlaşdırılır. Bu barədə Günəş Astronomiyası Laboratoriyası (XRAS) məlumat yayıb.
Səmavi cisim C/2026 A1 (MAPS) adı ilə qeydə alınıb. Hazırda kometa Yer kürəsindən təxminən 200 milyon kilometr məsafədə yerləşir.
Aparılan orbit analizləri göstərir ki, bu kometa 1106-cı ildə müşahidə edilən Böyük Kometanın qalıqlarından biri ola bilər. Həmin kometa vaxtilə son dərəcə parlaq olub və Çin, Yaponiya, eləcə də Britaniya ərazilərindən müşahidə edilib. Alimlərin fikrincə, qədim kometa parçalanıb və onun iri fraqmentlərindən biri 1843-cü ildə yenidən “Böyük kometa” kimi Yerə yaxınlaşıb.
Əgər hesablamalar doğru çıxarsa, milyardlarla il əvvəl formalaşmış bu kosmik obyektin mövcudluğuna cəmi 73 gün qalıb.
Qeyd edək ki, yanvarın 13-də astronomlar dərin kosmosdan gələn naməlum mənşəli 10 saniyəlik sirli siqnal da qeydə alıblar. Alimlər bu qısa, lakin son dərəcə güclü siqnalın təxminən 13 milyard işıq ili uzaqlıqdan – kainatın cəmi 730 milyon il yaşı olduğu dövrdən gələn qamma-şüa partlayışı olduğunu bildiriblər.

Urbaninfo.az