İki günəş dövründən sonra Yer ətrafında ilk dəfə S4 səviyyəli radiasiya fırtınası başlayıb. Bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyası (IKI RAN) Telegram kanalında məlumat yayıb.
Bildirilir ki, günəş protonları axını 10 000 vahidi keçib. Laboratoriyanın açıqlamasına görə, S5 səviyyəsi yalnız nəzəri olaraq mövcuddur və tarix boyu heç vaxt müşahidə edilməyib. Ən böyük radiasiya fırtınası isə XX əsrdə qeydə alınıb — o zaman proton axını təxminən 40 000 vahid təşkil edib.
Həmin gün bir neçə saat əvvəl Günəşdə M1.20 səviyyəli güclü partlayış baş verib (14:19), daha sonra isə C2.83 səviyyəli partlayış müşahidə olunub (maksimum 15:27).
Alimlər xəbərdarlıq edir ki, S4 səviyyəli radiasiya fırtınaları kosmik uçuşlar və peyk rabitəsi üçün təhlükə yarada bilər.