Honor şirkəti Çində Magic8 Pro Air smartfonunu təqdim edib. Yeni model markanın 2026-cı ildəki ən nazik və yüngül cihazıdır — qalınlığı 6,1 mm, çəkisi 155 qram təşkil edir.
Smartfon 5500 mAh batareya ilə təchiz olunub və 80 Vt naqilli, 50 Vt simsiz sürətli enerji yığılmasını dəstəkləyir. Cihazın korpusu alüminium ərintidən hazırlanıb və gündəlik istifadədə deformasiyaya qarşı 530 MPa davamlılığa malikdir.
6,31 düymlük AMOLED ekran 2K təsvir ölçüsü, 120 Hz dinamik yenilənmə tezliyi və 6000 nitədək pik parlaqlıq təklif edir. Smartfon MediaTek Dimensity 9500 prosessoru ilə işləyir.
Honor Magic8 Pro Air üçlü kamera sistemi ilə təchiz olunub: iki 50 MP-lik əsas və ultra-geniş bucaqlı modul və 64 MP-lik telefoto obyektiv (3,2x optik zum). Cihaz IP68/IP69 su və toz müqaviməti, ultrasonik barmaq izi skaneri, NFC, IR portu və stereo dinamiklərə malikdir.
Smartfon Android 16 əsaslı MagicOS 10 ilə işləyir və 23 yanvardan Çində satışa çıxacaq. Qiymət 4999 yuandan başlayır və qara, ağ, narıncı və bənövşəyi rənglərdə təqdim olunacaq.