İnternetdə yaxın vaxtlarda Yerə 10 metr diametrli CE2XZW2 asteroidinin düşəcəyi ilə bağlı yayılan məlumatlar həqiqətə uyğun deyil. Bu barədə Rusiya Elmlər Akademiyasının Kosmik Tədqiqatlar İnstitutunun (İKİ RAN) Günəş Astronomiyası Laboratoriyasının Telegram kanalında məlumat verilib.
Bildirilib ki, asteroidin guya yaxın vaxtlarda Yerə düşəcəyi barədə xəbərlər heç bir elmi yoxlama aparılmadan, yarıelmi internet kanallarından biri tərəfindən yayılıb. Laboratoriyanın açıqlamasında qeyd olunur ki, elmi faktların yoxlanılmasına vaxt ayırmadan psevdosensasiya xarakterli məlumatlar yayan şəxslərin mövcudluğu təəssüf doğurur.
Xatırladaq ki, bundan əvvəl Rusiya Elmlər Akademiyasının Tətbiqi Astronomiya İnstitutunun böyük elmi işçisi Nikolay Jeleznov “RIA Novosti”yə açıqlamasında yanvarın 14-də aşkar edilən CE2XZW2 asteroidinin həmin gün Yerə yaxınlaşa biləcəyini bildirmişdi. Alimin sözlərinə görə, asteroidin nominal trayektoriyası Yer mərkəzindən təxminən 3 min kilometr məsafədən keçir və planet üçün təhlükə yaratmır.
Eyni zamanda vurğulanıb ki, yeni aşkar edilən asteroidlərin orbitləri ilkin mərhələdə dəqiq müəyyənləşdirilmədiyi üçün toqquşma vaxtı ilə bağlı yekun qiymətləndirmə aparmaq hələ mümkün deyil.

Urbaninfo.az