Xüsusi kəskin, “çürük yumurta” qoxusu ilə tanınan hidrogen sulfid (serovodorod) qazının qaraciyər üçün qoruyucu təsir göstərə biləcəyi məlum olub. Nantunq Universitetinin Tibb Məktəbinin alimləri bu qazın qeyri-alkoqollu piylənmiş qaraciyər xəstəliyinin gedişini yüngülləşdirə biləcəyini müəyyən ediblər. Araşdırmanın nəticələri Hepatic Medicine: Evidence and Research elmi jurnalında dərc olunub.
Tədqiqatçılar serovodorodun bioloji təsirlərinə dair mövcud elmi məlumatları təhlil ediblər. Məlum olub ki, bu qaz orqanizmdə kükürdlü amin turşularının parçalanması zamanı əmələ gələn siqnal molekuludur. Sözügedən amin turşuları gündəlik qida rasionu ilə — yumurta, ət, süd məhsulları, qoz-fındıq, paxlalılar, eləcə də brokkoli, soğan və sarımsaq kimi xaççiçəklilərdən orqanizmə daxil olur.
Araşdırmaya əsasən, serovodorod qaraciyəri bir neçə istiqamətdə qoruyur. Siçanlar üzərində aparılan təcrübələrdə və insan hüceyrələri ilə aparılan laborator tədqiqatlarda bu qazın oksidləşdirici stressi və iltihabı azaltdığı, qaraciyər hüceyrələrində yağ mübadiləsini tənzimlədiyi müşahidə edilib. Bu təsir hüceyrələrin zədələnməsinin və vaxtından əvvəl məhvinin qarşısını alır.
Bundan əlavə, serovodorod toxumaların insulin hormonuna həssaslığını artırır ki, bu da qeyri-alkoqollu piylənmiş qaraciyər xəstəliyinin inkişaf riskini azaldan mühüm amillərdən biri hesab olunur.
Alimlər bildirirlər ki, əldə olunan nəticələr serovodorodu gələcəkdə qaraciyər xəstəliklərinin müalicəsində yeni terapevtik yanaşmalar üçün perspektivli hədəf kimi qiymətləndirməyə imkan verir. Bununla belə, hazırda söhbət əsasən eksperimental və doklinik mərhələdə olan araşdırmalardan gedir və klinik tətbiq üçün əlavə tədqiqatlara ehtiyac var.

Urbaninfo.az