Azərbaycan Respublikasının Medianın İnkişafı Agentliyi Böyük Britaniyanın “The Independent” və “The Guardian” qəzetlərində, eləcə də BBC-nin rusdilli xidmətində Azərbaycanla bağlı yayımlanan materiallara münasibət bildirib.
Agentliyin bəyanatında qeyd olunur ki, son günlər dərc edilən bəzi yazılarda Azərbaycanla bağlı həqiqətə uyğun olmayan və ictimai rəyi çaşdırmağa yönəlmiş məlumatlara yer verilib.
MEDİA hesab edir ki, həmin materiallarda aşkar birtərəfli yanaşma nümayiş etdirilib və mövzular obyektiv və balanslı şəkildə araşdırılmayıb. Yazı müəlliflərinin Azərbaycanın rəsmi mövqeyini öyrənmək üçün müvafiq addımlar atmadan subyektiv mülahizələrə əsaslanan fikirləri ictimaiyyətə təqdim etməsi tənqid olunub.
Bəyanatda vurğulanıb ki, bu yanaşma sözügedən materialların müəyyən lobbi dairələrinin maraqlarından irəli gələn siyasi sifariş xarakteri daşıdığı ilə bağlı ciddi şübhələr yaradır.
Agentlik bildirib ki, Azərbaycanın suverenliyinə, daxili və xarici siyasətinə, eləcə də beynəlxalq nüfuzuna kölgə salmağa yönələn bu kimi halların aidiyyəti üzrə araşdırılması və zəruri tədbirlərin görülməsi təmin ediləcək.
MEDİA adıçəkilən media qurumlarını bəyan etdikləri peşə prinsiplərinə sadiq qalmağa, Azərbaycanla bağlı birtərəfli və qərəzli materialların yayılmasından çəkinməyə, jurnalist etikası və tərəfsizlik prinsiplərinə uyğun informasiya siyasətini təmin etməyə çağırıb.