Azərbaycan Prezidenti İlham Əliyev ABŞ nümayəndə heyəti ilə Bakıda keçirilən görüşdə Azərbaycanla Ermənistan arasında artıq ticarət əlaqələrinin qurulduğunu və bu əlaqələrin uğurla inkişaf etdiyini bildirib.
Urbaninfo.az xəbər verir ki, dövlət başçısı vurğulayıb ki, Azərbaycan regional sülh gündəliyinin irəli aparılması istiqamətində səylərini bundan sonra da davam etdirəcək. Prezident İlham Əliyevin sözlərinə görə, Azərbaycan və Ermənistan arasında formalaşan ticarət münasibətləri regionda etimadın möhkəmlənməsinə xidmət edir.
“Ölkəmiz regional sülh gündəliyinin təşviqi üçün səylərini davam etdirəcək. Azərbaycanla Ermənistan arasında artıq ticarət əlaqələri qurulub. Ümid edirəm ki, TRIPP dəhlizi regional nəqliyyat əlaqəliliyinin genişlənməsi baxımından yeni imkanlar yaradacaq”, – deyə Prezident İlham Əliyev qeyd edib.
Prezident bildirib ki, hazırda Qazaxıstan və Rusiyadan Ermənistana buğda tədarükü Azərbaycan ərazisi vasitəsilə həyata keçirilir. Eyni zamanda, Bakı İrəvana Azərbaycanda istehsal olunan yüksək keyfiyyətli benzinin ilk partiyasını göndərib və neft məhsullarının ixracı gələcəkdə də davam etdiriləcək.
Trend-in məlumatına görə, Prezident İlham Əliyev bu gün Bakıda yerləşən iqamətgahında ABŞ nümayəndə heyətini qəbul edib. Nümayəndə heyətinə ABŞ Senatının Silahlı Qüvvələr Komitəsinin üzvü, Oklahoma ştatından respublikaçı senator Markueyn Mallin, eləcə də Nümayəndələr Palatasının bir sıra üzvləri daxil olub.
Amerikalı qonaqlar ötən ilin avqustunda Vaşinqtonda Azərbaycan-Ermənistan münasibətlərində sülh gündəliyinin irəlilədilməsi istiqamətində əldə olunan uğurlar münasibətilə dövlət başçısını təbrik ediblər.
Prezident İlham Əliyev əldə olunmuş razılaşmaların tarixi əhəmiyyətini xüsusi vurğulayaraq, bu prosesdə ABŞ Prezidenti Donald Trampın rolunu qeyd edib və Azərbaycanın regional sülhün möhkəmləndirilməsi istiqamətində ardıcıl siyasətini davam etdirəcəyini bir daha bəyan edib.