Bu il Bakıda keçiriləcək Ümumdünya Şəhərsalma Forumunun On Üçüncü sessiyası (WUF13) ilə bağlı özəl sektor nümayəndələri, akademik dairələr və tədqiqatçılar üçün məlumatlandırma sessiyalarının təşkili nəzərdə tutulur.
Məlumata görə, bu sessiyalar WUF13 çərçivəsində tərəfdaşlar üçün planlaşdırılan silsilə tədbirlərin tərkib hissəsidir. İlk məlumatlandırma görüşünün yanvarın 19-da keçirilməsi planlaşdırılır.
Sessiyalar zamanı WUF13 barədə ümumi məlumat veriləcək, eyni zamanda biznes strukturları, elmi-tədqiqat mühitinin nümayəndələri və onların şəbəkələri üçün Forumda iştirak imkanları ətraflı şəkildə izah olunacaq. Bu təşəbbüsün əsas məqsədi milli iştirakçılığın genişləndirilməsi və ölkə təmsilçiliyinin gücləndirilməsidir.
Məlumatlandırma sessiyalarında iştirak etmək istəyən şəxslər qeydiyyat üçün müvafiq elektron link vasitəsilə müraciət etməlidirlər. Müraciət zamanı iştirakçı haqqında qısa məlumat təqdim edilməli və uyğun sessiya vaxtı seçilməlidir.
Qeyd edək ki, şəhərsalma sahəsində beynəlxalq dialoq və əməkdaşlıq üçün mühüm platforma olan WUF13 qurum və təşkilatlara Forumun əsas mövzusu — “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” istiqamətində tədbirlər keçirmək imkanı yaradır.
Hazırda 2026-cı il 17–22 may tarixlərində Bakıda keçiriləcək WUF13 çərçivəsində tərəfdaş tədbirlərinin təşkili üçün qeydiyyat prosesi davam edir. Bu müraciətlər üçün son tarix 29 yanvar 2026-cı il olaraq müəyyən edilib. Qeydiyyat və tədbirlərin təşkili ilə bağlı əlavə suallar üçün unhabitat-events@un.org elektron poçt ünvanı ilə əlaqə saxlamaq mümkündür.
Xatırladaq ki, Ümumdünya Şəhərsalma Forumu urbanizasiya sahəsində ən nüfuzlu və genişmiqyaslı beynəlxalq platformalardan biridir. Forum çərçivəsində sürətli urbanizasiya prosesləri, bu proseslərin şəhərlərə, icmalara, iqtisadi inkişafa, iqlim dəyişikliklərinə və dövlət siyasətlərinə təsiri kimi aktual mövzular müzakirə olunur. WUF hökumət nümayəndələrini, alimləri, biznes liderlərini, şəhərsalma mütəxəssislərini və vətəndaş cəmiyyəti institutlarını bir araya gətirir.
Urbaninfo.az