Perm Politexnik Universitetinin alimləri müəyyən ediblər ki, tanımadığımız insan haqqında ilk təəssürat yalnız 7–10 saniyədə formalaşır və bu mərhələdə cinsiyyət stereotipləri təsirini göstərir. Araşdırmaya görə, kişilər qadınların yaşını orta hesabla 2–3 il aşağı qiymətləndirirlər.
Eksperiment zamanı iştirakçılara qısa, 10 saniyəlik videolar göstərilib – liftdə, kafedə və ya nəqliyyatda gündəlik vəziyyətlərdə. İştirakçılar dərhal həmin şəxsi təsvir edib, onun peşəsini təxmin ediblər.
Nəticələr göstərdi ki, hər iki cins əvvəlcə eyni xüsusiyyətlərə – görünüş, geyim, üz ifadəsi – diqqət yetirir. Lakin qiymətləndirmələr fərqlənir: kişilər neytral davranış göstərən kişiləri daha özünəinamlı, bacarıqlı və “işgüzar” kimi dəyərləndirir, qadınları isə daha az özünəinamlı və təvazökar hesab edirlər. Qadın müşahidəçilər isə eyni qadınları daha özünəinamlı görür.
Stereotiplər həmçinin təhsil və peşə haqqında fikir formalaşdırır: kişilər texniki, idarəetmə və mühəndislik sahələri ilə əlaqələndirilir, qadınlar isə təhsil, xidmət və yaradıcılıq sahələri ilə.
Alimlər bildirirlər ki, ilk təəssürat real xüsusiyyətləri əks etdirmir, əksinə sosial şablonlar əsasında formalaşır. Onlayn ünsiyyət şəraitində bu qavrayış səhvləri daha da güclənə və təhsil, karyera qərarlarına təsir edə bilər.