Çinin ABŞ-dakı səfirliyi Vaşinqtonun Pekinə qarşı irəli sürdüyü hakerlik ittihamlarını əsassız adlandırıb. Məlumata görə, səfirliyin rəsmi nümayəndəsi Lyu Pənnyuy bu iddiaları “spekulyasiya, qarayaxma və böhtan” kimi qiymətləndirib.
Urbaninfo.az xəbər verir ki, onun sözlərinə görə, ABŞ tərəfi bilərəkdən Çindən qaynaqlandığı iddia edilən kiber təhdidlərlə bağlı dezinformasiya yayır. Çin diplomatı vurğulayıb ki, Pekin haker fəaliyyətinin bütün formalarına qarşıdır və belə hücumları nə dəstəkləyir, nə də təşviq edir.
Bununla yanaşı, xatırladılıb ki, ötən ilin oktyabrında Çin Dövlət Təhlükəsizliyi Nazirliyi ABŞ Milli Təhlükəsizlik Agentliyini Çinin Milli Zaman Xidməti Mərkəzinə kiberhücumda ittiham etmişdi. Pekinin iddiasına görə, hücum baş tutsaydı, rabitə, maliyyə, enerji və nəqliyyat sistemlərində ciddi pozuntular yarana, hətta kosmik buraxılışlara mənfi təsir göstərə bilərdi.