İrandan Azərbaycana 20 kiloqramdan artıq narkotik keçirilməsinin qarşısı alınıb.

Bu barədə Urbaninfo.az-a Dövlət Sərhəd Xidmətinin Mətbuat Mərkəzindən məlumat verilib.

Bildirilib ki, Dövlət Sərhəd Xidmətinin Sərhəd Qoşunları Komandanlığının “Horadiz” sərhəd dəstəsinin xidməti ərazisində keçirilmiş sərhəd axtarışı və əməliyyat tədbirləri nəticəsində ümumi çəkisi 20 kiloqram 615 qram narkotik vasitə marixuana və 470 ədəd psixotrop tərkibli Metadon M-40 həbinin İran İslam Respublikasından Azərbaycan Respublikası ərazisinə keçirilməsinin qarşısı alınıb.

Fakt üzrə əməliyyat-istintaq tədbirləri davam etdirilir.

Qusar rayonunda törətdiyi cinayət əməllərinə görə axtarışda olan şəxs saxlanılarkən odlu silahla polis əməkdaşlarına müqavimət göstərib.

Urbaninfo.az xəbər verir ki, görülən tədbirlərlə R.Rəsulov zərərsizləşdirilib.

Hadisə yerindən tapança aşkar olunaraq götürülüb.

Araşdırmalar davam etdirilir.

Lənkəranda hotel işçilərinə qarşı quldurluq edən şəxs saxlanılıb.

Urbabibfo.az xəbər verir ki, bu barədə Daxili İşlrər Nazirliyi (DİN) məlumat yayıb.

Bildirilib ki, Lənkəran rayonunda yerləşən hotellərin birində çalışan iki qadına naməlum şəxs kəsici alətlə xəsarət yetirərək zərərçəkənlərin qızıl-zinət əşyalarını ələ keçirib.

Polis əməkdaşlarının həyata keçirdikləri tədbirlərlə əməli törətməkdə şübhəli bilinən həmin otelin inzibatçısı 49 yaşlı Xalıq Cahangirov müəyyən edilərək saxlanılıb.

Araşdırmalarla məlum olub ki, X.Cahangirov tanınmaması üçün əvvəlcədən iş yerində gizlətdiyi maska və geyimlə kamuflaj olaraq həmin hadisəni törədib.

Faktla bağlı cinayət işi başlanılıb, saxlanılan şəxs barəsində məhkəmənin qərarı ilə həbs qətimkan tədbiri seçilib.

Qəsdən adam öldürməkdə ittiham olunan Katıf Gülməmmədlinin barəsindəki cinayət işi üzrə məhkəməsi başa çatıb.

Urbaninfo.az-ın məlumatına görə, Şəki Ağır Cinayətlər Məhkəməsində baş tutan prosesdə təqsirləndirilən şəxsə hökm oxunub, o, 10 il müddətinə azadlıqdan məhrum edilib.

Hadisə 2023-cü ildə baş verib. İttihama görə, Şəkidə qeydiyyatda olan 1998-ci il təvəllüdlü K.Gülməmmədov faktiki Bakıda yaşayıb. O, hərbi biletini götürmək üçün Şəkinin İnçə kəndinə - atasının yaşadığı evə gedib. Atası ilə münasibətləri normal olmayan Katıf evdə hərbi biletini axtarıb. O, daha sonra soyuducudan götürdüyü iki ədəd yumurtanı qaz sobasında bişirib yemək istəyərkən atası - 1959-cu il təvəllüdlü İsmayıl Gülüyev evə gəlib və onların arasında mübahisə yaranıb.

İ.Gülüyev yumurta bişirdiyi üçün ona irad tutub. Ata-oğul mübahisə edərkən İ.Gülüyev Katıfın anasının qəbrini və bacısını söyüb. Bundan əsəbiləşən Katıf atasını boğaraq öldürüb. O, daha sonra evi tərk edərək Bakı şəhərinə qaçıb.

Polis əməkdaşlarının keçirdiyi əməliyyatla hadisəni törətməkdə şübhəli bilinən Katıf Gülməmmədli saxlanılaraq istintaqa təhvil verilib.

Faktla bağlı mayın Şəki rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb və K.Gülməmmədli şübhəli şəxs qismində tutularaq istintaqa cəlb edilib.

Ötən ilin noyabrında Bakının Yasamal rayonunda baş verən və jurnalist Könül Vəlibəylinin də həyatını itirdiyi faciəli yanğınla bağlı cinayət işi üzrə istintaq yekunlaşıb. Hadisə nəticəsində 3 nəfər ölüb, 25 nəfər isə müxtəlif dərəcəli xəsarətlər alıb.

Baş Prokurorluğun yaydığı məlumata görə, Mirəli Seyidov küçəsində yerləşən çoxmərtəbəli yaşayış binasında qeydə alınmış yanğın faktı üzrə aparılan araşdırmalar zamanı binanın birinci və zirzəmi mərtəbəsində fəaliyyət göstərən “Loft Dent” stomatoloji klinikasının direktoru Bəhruz Paşayevin yanğın təhlükəsizliyi qaydalarını pozduğu müəyyən edilib.

İstintaqın gəldiyi nəticəyə əsasən, təhlükəsizlik qaydalarına əməl olunmaması ehtiyatsızlıqdan insanların ölümünə və xəsarət almasına, həmçinin mənzillərə ciddi maddi ziyanın dəyməsinə səbəb olub.

Bəhruz Paşayevə Cinayət Məcəlləsinin 225.3-cü maddəsi ilə yekun ittiham irəli sürülüb və məhkəmənin qərarı ilə onun barəsində həbs qətimkan tədbiri seçilib.

Cinayət işi baxılması üçün Bakı Ağır Cinayətlər Məhkəməsinə göndərilib. Bununla yanaşı, binanın tikintisinə və istismarına cavabdeh olan MTK rəhbərliyinin istintaqa cəlb olunmaması ictimai müzakirələrə səbəb olub.

İki həmyaşıdını öldürməyə cəhddə təqsirləndirilən 2008-ci il təvəllüdlü Firac Hüseynovun barəsindəki cinayət işi üzrə məhkəmə prosesi yekunlaşıb.

Urbaninfo.az xəbər verir ki, oxu.az-ın məlumatına görə, Bakı Ağır Cinayətlər Məhkəməsinin hakimi Kamil Əliyevin sədrliyi ilə keçirilən son iclasda dövlət ittihamçısı Eldar Məmmədov ittiham nitqi ilə çıxış edib. O, təqsirləndirilən şəxsin 7 il 6 ay müddətinə azadlıqdan məhrum olunmasını təklif edib.

Vəkil müdafiə çıxışı etdikdən sonra təqsirləndirilən şəxs son söz deyib. O, əməlindən peşman olduğunu bildirib.

Məhkəmə müşavirədən sonra hökmü elan edib, Firac Hüseynov 7 il 6 ay müddətinə azadlıqdan məhrum olunub.

Xatırladaq ki, Azərbaycan qanunvericiliyinə görə yetkinlik yaşına çatmayanların azadlıqdan məhrumetmə cəzası 10 ilədəkdir.

Qeyd edək ki, hadisə ötən ilin oktyabrında paytaxtın Xəzər rayonu ərazisində qeydə alınıb.

Belə ki, Firac Hüseynov iki həmyaşıdını bıçaqlayıb.

Xəstəxanaya çatdırılan zərərçəkmişlərin həyatını xilas etmək mümkün olub.

Ona qarşı Cinayət Məcəlləsinin 29,120.2.7-ci (qəsdən iki və ya daha çox şəxsi öldürməyə cəhd etmə), 29,120.2.2-ci (xuliqanlıq niyyəti ilə adam öldürməyə cəhd) və 29,120.2.4-cü (Qəsdən adam öldürməyə cəhd, zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürməyə cəhd) maddələri ilə ittiham irəli sürülüb.

Bakı Ağır Cinayətlər Məhkəməsində həyat yoldaşını öldürməyə cəhddə təqsirləndirilən Vasif Kərimovun cinayət işinin bəzi təfərrüatları məlum olub.

Urbaninfo.az pravda.az-an istinadla xəbər verir ki, hakim Babək Pənahovun sədrliyi ilə keçirilən prosesdə ittiham aktı elan olunub.

İttihama əsasən, təqsirləndirilən şəxs həyat yoldaşını qısqanclıq zəminində onu odlu silahla yaralayıb. Marqarita pizza

Vasif Kərimov 2025-ci ilin iyul ayında Bakı şəhəri, Yasamal rayonu, M.Xiyabani küçəsində yerləşən yaşayış binasının qarajında arvadı F.Kərimova ilə aralarında baş verən mübahisə zamanı qəsdən öldürmək niyyəti ilə hərəkət edib.

Hadisə zamanı o, əvvəllər ovçuluq fəaliyyəti üçün saxladığı, rəsmi icazəli 12 kalibrli “Huğlu-Renova” markalı yivsiz odlu ov silahından istifadə edərək yaxın məsafədən bir neçə dəfə atəş açıb. Nəticədə zərərçəkmiş şəxs qarın boşluğundan ağır güllə yaraları alıb, daxili orqanların zədələnməsi və kəskin daxili qanaxma ilə müşayiət olunan həyati təhlükəli xəsarətlər baş verib.

İttihamda qeyd olunur ki, Vasif Kərimov əməlini davam etdirmək niyyətində olsa da, silahda patronların tükənməsi və arvadının vaxtında tibbi yardıma çatdırılması səbəbindən cinayət əməlini başa çatdıra bilməyib və bu səbəbdən əməl qəsdən adam öldürməyə cəhd kimi qiymətləndirilib.

Materiallara əsasən, ailə münaqişəsi bir müddət əvvəl başlayıb. Mübahisələr davamlı xarakter alıb.

İttihama görə, hadisə günü tərəflər Xızı rayonuna gedərkən geri qayıtmaq məcburiyyətində qalıb və Yasamal rayonunda yerləşən qarajda mübahisə yenidən alovlanıb. Bu zaman qadın boşanma, ayrılıq və uşaqların himayəsi ilə bağlı məsələlər qaldırıb. Təqsirləndirilən şəxs isə həmin anda emosional vəziyyətini itirdiyini və silahı qorxutmaq məqsədilə götürdüyünü bildirib. Buna baxmayaraq, Vasif silahdan istifadə edərək zərərçəkmişə qarın nahiyəsindən atəş açıb.

Atəşdən sonra F.Kərimova yerə yıxılıb. Təqsirləndirilən şəxs daha sonra silahı kənara qoyaraq hadisə yerindən çıxıb və dərhal təcili tibbi yardım və polisə məlumat verdiyini deyib. Zərərçəkmiş xəstəxanaya çatdırılaraq xilas edilib.

Məhkəmə istintaqı zamanı Vasif ona elan olunmuş ittiham üzrə özünü qismən təqsirli bilib.

O, ifadəsində qeyd edib ki, ailə həyatında uzun müddət ciddi problem olmayıb, sonradan şübhələr yaranıb. Həmçinin o söyləyib ki, hadisə günü məqsədi öldürmək yox, qorxutmaq olub və əməlindən dərhal sonra peşman olaraq yardım çağırıb.

Təqsirləndirilən şəxs həmçinin zərərçəkmişlə barışıq əldə olunduğunu, ailəsinin dağılmasını istəmədiyini və daha yüngül maddə ilə tövsif edilməsini xahiş edib.

Vasif Kərimovla zərərçəkmiş şəxsin nümayəndələri barışdıqları üçün məhkəmənin hökmü ilə onun barəsində Cinayət Məcəlləsinin 62-ci maddəsi (cinayətə görə müəyyən edilmiş cəzadan daha yüngül cəza təyini) tətbiq olunub və 4 il azadlıqdan məhrum edilib.

Xatırlatma: Vasif Kərimov Bakıda fəaliyyət göstərən "Referens" klinikasının Mərdəkan filialının direktoru olub.

67 yaşlı anasını yad kişilərlə yüngül həyat keçirməsini bəhanə edərək qətlə yetirən Emil Ağayevin cinayət işinin bəzi detalları məlum olub.

Urbaninfo.az "Unikal"a istinadla xəbər verir ki, hadisə 2026-cı il yanvarın 24-də Sabunçu rayonu, Ramana qəsəbəsi, "Gülçülük sovxozu" ərazisində baş verib.

İttiham aktında göstərilib ki, Emil Ağayev heç bir əsaslı səbəb olmadan doğma anası Həyat Ağayevanın istifadəsində olmuş mobil telefonda kişilərlə telefon əlaqələrinin olmasını, yüngül həyat tərzi keçirməsini bəhanə gətirərək onu qəsdən öldürmək qərarına gəlib.

O, 2026-cı il yanvarın 24-də səhər saatlarında birgə yaşadıqları evdə heç kimin olmamasından istifadə edərək həmin vaxtı işdə olan Həyat Ağayevaya zəng edərək qayınatasının onların evinə qonaq gələcəyinə dair yalan məlumat verib.

İstintaqla müəyyən edilib ki, Emil həmin gün anasını taksi ilə iş yerindən götürüb saat 10 radələrində yaşadıqları Sabunçu rayonu, Ramana qəsəbəsi, "Gülçülük sovxozu" ərazisində yerləşən fərdi yaşayış evinə gətirib. Daha sonra qəsdən adam öldürməyə yönəlmiş niyyətini həyata keçirmək üçün evin qonaq otağında 67 yaşlı Həyat Ağayevanın qəflətən üzərinə hücum edib.

O, anasına qəddarlıq və rəhmsizlik göstərərək, hər iki əli ilə onun boğaz nahiyəsindən sıxıb, eyni zamanda, sifətinə yumruq zərbələri vuraraq döşəmənin üzərinə yıxıb. Daha sonra niyyətini başa çatdırmaq üçün evin mətbəx otağından götürdüyü bıçaqla Həyat Ağayevaya arxadan yaxınlaşaraq onu nisbətən yuxarı istiqamətdə dikəldib və boyun nahiyəsindən iki dəfə zərbə vuraraq kəsib.

Bununla da Emil Ağayev anası Həyat Ağayevanı xüsusi amansızlıqla öldürərək həyatdan məhrum edib.

Ona qarşı Cinayət Məcəlləsinin 120.2.2-ci (xuliqanlıq niyyəti ilə adam öldürmə), 120.2.4-cü (xüsusi amansızlıqla qəsdən adam öldürmə) və 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə, habelə adam oğurluğu və ya girov götürülməsi ilə bağlı adam öldürmə) maddələri ilə ittiham irəli sürülüb.

Qeyd edək ki, cinayət işinin məhkəmə istintaqı hakim Namiq Kərimovun sədrliyi ilə araşdırılır.