Öldürülən şagirdin əmisi təqsirləndirilən yeniyetmə ilə bağlı açıqlama verib

Bakıda sinif yoldaşını öldürməkdə təqsirləndirilən yeniyetmənin məsuliyyətdən azad edilməsi üçün cəhd göstərildiyi iddia edilir.

Bunu qətlə yetirilən A.Ağayevin əmisi Zöhrab Ağayev deyib.

O bildirib ki, təqsirləndirilən A.Hüseynovun yaxınları onun anlaqsız olması barədə sənəd əldə etməyə çalışırlar.

Z.Ağayevin sözlərinə görə, oktyabrın 5-də A.Hüseynov qardaşı oğlunu telefonla məktəbin arxasına çağırıb. O, burada yeniyetməni bıçaqlayıb.

Mərhumun əmisi hadisənin əvvəlcədən planlaşdırıldığını iddia edib. Onun sözlərinə görə, hadisədən bir həftə əvvəl də həmin şagird məktəbin 11-ci sinif şagirdləri ilə mübahisə edib və onların üzərinə qayçı ilə hücum edib.

Z.Ağayev qeyd edib ki, ailə məsələnin obyektiv araşdırılmasını və təqsirləndirilən şəxsin məsuliyyətdən yayındırılmasına yol verilməməsini istəyir.

Qeyd edək ki, hadisə Bakının Nizami rayonunda yerləşən orta məktəblərdən birində baş verib. 9-cu sinif şagirdinin sinif yoldaşını bıçaqlayaraq öldürdüyü bildirilir.