Baş Prokurorluq və Daxili İşlər Nazirliyinin (DİN) birgə həyata keçirdiyi istintaq və əməliyyat-axtarış tədbirləri nəticəsində xüsusilə ağır cinayətin üstü açılıb.

Belə ki, 2013-cü il avqustun 5-də saat 20 radələrində Şəmkir şəhər sakini, 59 yaşlı Kifayət Məhərrəmovanın yaşadığı mənzildə xüsusi amansızlıqla qətlə yetirilməsi faktı üzrə Cinayət Məcəlləsinin 120.2.4-cü maddəsi ilə başlanmış cinayət işinin istintaqı Baş Prokurorluğun İstintaq idarəsində davam etdirilib.

Aparılan kompleks istintaq və əməliyyat-axtarış tədbirləri nəticəsində Şəmkir rayon sakini Xəyal Məmmədovun tamah məqsədilə Kifayət Məhərrəmovanı yaşadığı mənzildə cib bıçağı ilə çoxsaylı zərbələr endirərək xüsusi amansızlıqla öldürməsinə əsaslı şübhələr müəyyən edilib.

İstintaqla, həmçinin onun hadisədən sonra mənzildən 100 manat pul və qızıl-zinət əşyaları götürərək hadisə yerindən uzaqlaşdığı müəyyənləşdirilib.

X.Məmmədov şübhəli şəxs qismində verdiyi ifadəsində, eləcə də ifadəsinin yerində yoxlanılması zamanı cinayəti törətdiyini etiraf edib.

O, Cinayət Məcəlləsinin 120.2.4-cü (xüsusi amansızlıqla adam öldürmə) və 120.2.5-ci (tamah məqsədilə adam öldürmə) maddələri ilə təqsirləndirilən şəxs qismində cəlb edilərək ona ittiham elan olunub.

Şəmkir Rayon Məhkəməsinin qərarı ilə X.Məmmədov barəsində həbs qətimkan tədbiri seçilib.

Hazırda cinayət işi üzrə zəruri istintaq və əməliyyat-axtarış tədbirləri davam etdirilir.

Baş Prokurorluq və DİN tərəfindən ötən illərdə bağlı qalmış cinayətlərin, o cümlədən itkin düşmüş şəxslərlə bağlı faktların araşdırılması və açılması istiqamətində kompleks tədbirlər davam etdirilir.