Azərbaycanın Sankt-Peterburqdakı sabiq Baş konsulu Sultan Qasımovun məhkəməsi ikinci dəfə təxirə salınıb.

Qafqazinfo-nun məlumatına görə, bu gün Bakı Ağır Cinayətlər Məhkəməsində iş üzrə hazırlıq iclası keçirilməli idi.

Lakin külli miqdarda dələduzluqda ittiham olunan S.Qasımovun vəkili məhkəməyə gəlməyib. Təqsirləndirilən şəxs bildirib ki, vəkili Gəncə və Şamaxıda digər məhkəmə işlərində iştirak edir.

Hakim Firdovsi Əliyev və prokuror Rauf Malışov vəkilin iclasa gəlməməsinə sərt reaksiya verərək bunun prosesi süni şəkildə uzatdığını bildiriblər.

Bundan əvvəlki iclas da S.Qasımovun ittiham aktını almaması səbəbindən baş tutmayıb.

Məhkəmə prosesi vəkilin iştirakı təmin olunmadığı üçün sentyabrın 30-na təxirə salınıb.

Xatırladaq ki, polkovnik rütbəli Sultan Qasımov 2009-2024-cü illərdə Azərbaycanın Rusiyanın Yekaterinburq və Sankt-Peterburq şəhərlərində baş konsulu olub.

O, iki nəfərə dələduzluq yolu ilə 200 min manat ziyan vurmaqda ittiham edilir. S.Qasımov həbsdə deyil, barəsində alternativ qətimkan tədbiri seçilib.

Sultan Qasımov Azərbaycan Prezidentinin sabiq mətbuat katibi Azər Qasımovun qardaşıdır.