Şəkidə iki gəncin ölümü ilə nəticələnən hadisənin ictimaiyyətə təqdim olunması mərhum Ucal Bayramovun ailəsinin narazılığına səbəb olub.

Bakupost.az xəbər verir ki, Ucal Bayramovun bacısı Xəyalə Bayramova AzTV-də yayımlanan süjetlə bağlı narazılığını ifadə edib.

O, hadisənin təqdimatının ailə tərəfindən qəbul edilmədiyini bildirib və məsələnin hüquqi müstəvidə araşdırılacağını deyib.

X.Bayramovanın sözlərinə görə, zərurət yaranacağı təqdirdə məsələ beynəlxalq müstəviyə də çıxarıla bilər.

“Yasımız var, yazılanlara, deyilənlərə müdaxilə edə bilmirik. O halda, vəziyyətdə deyilik. Amma bunu deyim ki, lazım olsa, bu məsələ hüquqi müstəvidə Azərbaycan hüdudlarını da aşacaq. Qardaşımın qanı yerdə qalmayacaq. O yalan xəbəri sifariş edənlər də bizim kimi yansınlar...”, – deyə o bildirib.

Xatırladaq ki, AzTV-nin hazırladığı süjetdə hadisənin trosun qırılması səbəbindən baş vermədiyi, güclü külək və yaranmış təlaş nəticəsində ziplayn roliklərinin trosdan çıxması ilə gənclərin həyatını itirdiyi bildirilib.

Süjetdə gənclərin kanatdan istifadə etməzdən əvvəl sığorta sənədinə imza atdığı da qeyd olunub.