Tamam Həsənova bununla bağlı müraciətində bildirib ki, oğlu hazırda Bakı Ağır Cinayətlər Məhkəməsində baxılan cinayət işi çərçivəsində həbsdə saxlanılır.

Onun sözlərinə görə, Rəşad İlyasov “JOY Tour” şirkətinin 50 faiz paya malik həmtəsisçisi olub. Şirkətin idarə olunması və gündəlik fəaliyyətinin həyata keçirilməsinə isə 2017-ci ildən digər həmtəsisçi Nərmin Fətullayeva rəhbərlik edib.

T.Həsənova iddia edir ki, R.İlyasov şirkətdə şəffaflığın təmin olunmasına çalışıb və turistlərdən ödənişlərin şəxsi kartlara deyil, şirkətin rəsmi hesabına köçürülməsini tələb edib. Onun sözlərinə görə, satışların uçotunun aparılması üçün TMS nəzarət sistemi də məhz bu məqsədlə tətbiq olunub.

Müraciətdə qeyd olunur ki, turistlərdən daxil olan vəsaitlərin əhəmiyyətli hissəsinin N.Fətullayevanın şəxsi bank kartlarına qəbul edildiyi müəyyənləşib. T.Həsənova bu faktın N.Fətullayevanın izahatında da göstərildiyini bildirib. O, həmçinin bank təhlükəsizlik kodlarının həmin şəxsin telefonuna göndərildiyini, kassa və seyfə nəzarətin də onun əlində olduğunu iddia edib.

T.Həsənovanın sözlərinə görə, R.İlyasov sistemdə əks olunan turist məlumatları ilə şirkətin maliyyə vəziyyətini müqayisə etdikdən sonra yeni satışların dayandırılması və mövcud öhdəliklərin icrası barədə qərar verib. O, 2025-ci ilin avqustunda yeni satış cəhdinə də etiraz edib.

Müraciətçi bildirib ki, sonradan problem yaşayan 40-a yaxın turistin böyük hissəsinin məlumatlarının TMS sistemində əks olunmadığı məlum olub.

R.İlyasovun anası oğluna qarşı irəli sürülən vəzifə səlahiyyətlərindən sui-istifadə ittihamının da əsaslandırılmasını tələb edir. O qeyd edib ki, sonradan sistemə daxil edildiyini bildirdiyi direktor və maliyyə direktoru müqavilələri R.İlyasov tərəfindən SİMA ilə təsdiqlənməyib.

T.Həsənova həmçinin oğlunun ofisin möhürlənməsi və daha sonra ofisin onun və vəkilinin iştirakı olmadan açılması ilə bağlı da sualların olduğunu bildirib.

“Cinayəti kim törədibsə, məsuliyyət də onun üzərinə düşməlidir. Turistlərin vəsaitlərini kimin qəbul etdiyi, satışların kim tərəfindən sistemdən kənarda saxlandığı və pulların kim tərəfindən idarə edildiyi müəyyənləşdirilməlidir”, - deyə o bildirib.

T.Həsənova qeyd edib ki, oğlunun mənimsədiyi iddia olunan konkret vəsaitin, həmin pulun hansı turistə aid olduğunun və R.İlyasovun şəxsi hesabına hər hansı vəsait daxil olub-olmadığının araşdırılmasını istəyir.

O, eyni zamanda, cinayət işi üzrə digər şəxslərlə bağlı qəbul edilən qərarların da araşdırılmasını tələb edib.

Tamam Həsənova məsələ ilə əlaqədar dövlət rəhbərliyinə və aidiyyəti qurumların rəhbərlərinə müraciət etdiyini açıqlayıb.

Qeyd edək ki, yazıda əks olunan iddialar T.Həsənovanın açıqlamalarına əsaslanır. R.İlyasovun təqsirli olub-olmamasına hüquqi qiymət məhkəmə tərəfindən veriləcək.