Sabunçuda neft kəmərinə müdaxilə edən şəxslər yanğına səbəb olub – 2 nəfər saxlanıldı
Bakının Sabunçu rayonunda magistral neft kəmərindən oğurluğa cəhd göstərən iki nəfər saxlanılıb.
Hadisə sentyabrın 2-də gecə saatlarında Maştağa qəsəbəsində, Savalan yaşayış massivinin yaxınlığında baş verib. Həmin ərazidən keçən yeraltı magistral neft kəmərində yanğın qeydə alınıb və hadisə barədə polisə məlumat verilib.
Yanğın söndürüldükdən sonra ərazidə aparılan baxış zamanı kəmərə qanunsuz müdaxilə etmək üçün müxtəlif əlavə avadanlıqların quraşdırıldığı üzə çıxıb.
Polis əməkdaşlarının keçirdiyi əməliyyat-axtarış tədbirləri nəticəsində kəmərə qanunsuz müdaxilə edərək neft oğurlamağa cəhd göstərməkdə şübhəli bilinən 31 yaşlı Kənan Əliyev və əvvəllər məhkum olunmuş 29 yaşlı Araz Yaqubov saxlanılıb.
Araşdırma zamanı yanğının da məhz şübhəli şəxslərin neft kəmərinə qanunsuz müdaxiləsi nəticəsində baş verdiyi müəyyənləşdirilib.
Faktla bağlı araşdırma davam etdirilir.
