Zəngəzur dəhlizinin açılması artıq ABŞ Prezidenti səviyyəsində də təsdiq olunub. Urbaninfo.az xəbər verir ki, bu barədə Azərbaycan Prezidenti İlham Əliyev yanvarın 5-də yerli televiziya kanallarına verdiyi müsahibədə bildirib.
Dövlət başçısının sözlərinə görə, ötən il avqustun 8-də Vaşinqtonda keçirilmiş sülh görüşü zamanı Azərbaycanın əsas hissəsi ilə Naxçıvan Muxtar Respublikası arasında coğrafi bağlantının yaradılması ilə bağlı mühüm razılaşmalar əldə olunub.
Prezident qeyd edib ki, həmin görüş çərçivəsində ABŞ–Azərbaycan strateji işçi qrupunun yaradılmasına dair sənəd imzalanıb. Bu qrupun əsas məqsədi strateji tərəfdaşlıq xartiyasının hazırlanmasıdır və artıq bu istiqamətdə fəal iş aparılır.
İlham Əliyev vurğulayıb ki, uzun illərdir gözlənilən əsas məsələ — Azərbaycanın əsas hissəsi ilə Naxçıvan arasında birbaşa bağlantının təmin olunması məhz həmin gün reallığa çevrilib:
“Zəngəzur dəhlizinin açılması artıq Amerika Prezidenti tərəfindən də təsdiqlənib. Onun adı fərqli ola bilər, lakin mahiyyət dəyişmir. Azərbaycan cəmiyyətində də artıq bu məsələnin reallaşacağına dair heç bir şübhə yoxdur”.
Prezident bildirib ki, Ermənistan sərhədinə qədər dəmir yolunun fiziki hazırlığı 70 faizə, avtomobil yolunun hazır vəziyyəti isə təxminən 95 faizə çatıb. Azərbaycan tərəfi işləri daha da sürətləndirə bilər, lakin Ermənistan ərazisində hələ heç bir inşaat işinə başlanılmadığı üçün buna ehtiyac yaranmır.
Onun sözlərinə görə, Ermənistan ərazisində 42 kilometrlik yolun tikintisi nəzərdə tutulur. Paralel olaraq Naxçıvan istiqamətində təxminən 190 kilometrlik yol mövcuddur və hazırkı vəziyyəti ideal olmasa da, daşımalar üçün kifayət edir. Hazırda olmayan dəmir yolu hissələrinin tikintisinə başlanılıb və bu işlərin bir-iki il ərzində tamamlanacağı gözlənilir.
Prezident İlham Əliyev qeyd edib ki, layihə tam başa çatdıqdan sonra dəhlizin illik yükötürmə qabiliyyəti 15 milyon ton olacaq və bu marşrut həm Şərq–Qərb, həm də Şərq–Cənub, eyni zamanda Şimal–Cənub nəqliyyat dəhlizlərinin mühüm qolu rolunu oynaya bilər.
Dövlət başçısı əlavə edib ki, Zəngəzur dəhlizi istifadəyə veriləndən sonra sovet dövründə mövcud olmuş Sovet İttifaqı–İran marşrutu da bərpa ediləcək. Beləliklə, Rusiya–Bakı–Ağbənd–Ermənistan–Naxçıvan–Culfa–Fars körfəzi xətti Şimal–Cənub dəhlizinin alternativ marşrutuna çevriləcək.
Prezidentin sözlərinə görə, bu yol eyni zamanda Orta Dəhlizin ikinci istiqaməti olacaq və Naxçıvandan həm Türkiyə–Avropa, həm də İran–Fars körfəzi–Yaxın Şərq istiqamətlərinə çıxış təmin edəcək. Yüklərin əsas toplanma mərkəzi isə Azərbaycan olacaq.
İlham Əliyev onu da bildirib ki, Azərbaycanın təşəbbüsü ilə Ağbənd qəsəbəsində Araz çayı üzərindən körpü inşa edilir. Bu körpü vasitəsilə həm Qərb, həm də Cənub istiqamətində alternativ marşrutlar formalaşacaq: biri Ermənistan üzərindən Zəngəzur dəhlizi, digəri isə İran üzərindən Araz dəhlizi.
“Hazırda Azərbaycanın əsas hissəsindən Naxçıvana getmək üçün uzun yol qət olunur. Yeni marşrut isə İran ərazisindən cəmi 45–50 kilometrlik məsafəni əhatə edəcək. Beləliklə, Naxçıvanla ölkənin əsas hissəsi arasında iki etibarlı bağlantı yaranacaq və biz faktiki olaraq Naxçıvanı, Şərqi Zəngəzuru və Qarabağı vahid iqtisadi-logistik bölgə kimi birləşdirəcəyik”, – deyə Prezident vurğulayıb.