Tokayev: Xəzərdən yükdaşımalar 4 dəfə arta bilər
Qazaxıstan Prezidenti Orta Dəhlizin inkişaf perspektivlərindən danışıb
Qazaxıstan Prezidenti Kasım-Jomart Tokayev Xəzər Beynəlxalq Nəqliyyat Marşrutunun inkişafının prioritet istiqamətlərdən biri olduğunu bildirib.
O, bu barədə Azərbaycan və Mərkəzi Asiya dövlət başçılarının 8-ci Məşvərət görüşündə çıxışında deyib.
Tokayevin sözlərinə görə, Çin, Xəzər dənizi və Avropa bazarlarını birləşdirən genişmiqyaslı avtomobil yolu layihəsinin icrasına başlanılır.
Qazaxıstan lideri nəqliyyat infrastrukturunun modernləşdirilməsinin regionun tranzit imkanlarını artıracağını vurğulayıb.
O qeyd edib ki, Dünya Bankının hesablamalarına əsasən, infrastruktur layihələrinin tam həyata keçirilməsi Xəzər dənizi vasitəsilə yükdaşımaların 2040-cı ilədək 4 dəfə artmasına imkan verə bilər.
Tokayev, həmçinin Orta Dəhlizin TRIPP təşəbbüsü ilə inteqrasiyasının mümkünlüyünü qeyd edib.
