Energetika naziri Pərviz Şahbazov Azərbaycanın Cənubi Qafqaz, Mərkəzi Asiya və Avropa arasında yeni enerji əlaqələrinin qurulmasında, regional enerji təhlükəsizliyinin möhkəmləndirilməsində və enerji əməkdaşlığının inkişafında strateji rolunu vurğulayıb.

Nazir bu barədə İkinci Azərbaycan Beynəlxalq İnvestisiya Forumu çərçivəsində keçirilən “Regional enerji bağlantısı və yaşıl keçid: çağırışlar və imkanlar” sessiyasında çıxışı zamanı danışıb.

P.Şahbazov bildirib ki, enerji və nəqliyyat dəhlizləri, eləcə də elektrik şəbəkələrarası birləşdiricilər qlobal enerji sisteminin yeni arteriyalarına çevrilir.

Onun sözlərinə görə, XXI əsrdə bağlantılar yalnız ölkələri və bazarları birləşdirən fiziki infrastruktur deyil, eyni zamanda iqtisadi və geosiyasi münasibətlərin yeni arxitekturasının əsasını təşkil edir.

Nazir qeyd edib ki, ötən əsrin enerji xəritəsi əsasən neft və qaz yataqlarının coğrafiyası və boru kəmərləri ilə formalaşıbsa, XXI əsrdə bu xəritə ölkələri, regionları və qitələri birləşdirən elektrik şəbəkələri, enerji saxlama sistemləri və yaşıl enerji dəhlizləri ilə yenidən formalaşır.

P.Şahbazov Azərbaycan-Gürcüstan-Türkiyə-Bolqarıstan Yaşıl Enerji Dəhlizi üzrə hökumətlərarası sazişin bu ilin noyabrında keçiriləcək COP31 çərçivəsində imzalanmasının planlaşdırıldığını bildirib.

Nazir, həmçinin Naxçıvan vasitəsilə Azərbaycan-Türkiyə elektrik enerjisi bağlantısının inkişafının xüsusi strateji əhəmiyyət daşıdığını vurğulayıb.

Onun sözlərinə görə, ilkin ötürmə gücü 1 QVt olan layihə iki ölkənin enerji sistemləri arasında yeni bağlantı yaradacaq. Gələcəkdə layihə Azərbaycanın digər bölgələrində və Mərkəzi Asiyada istehsal olunan yaşıl elektrik enerjisinin Zəngəzur dəhlizi vasitəsilə Türkiyə və Avropa bazarlarına çıxarılması üçün əlavə imkanlar yarada bilər.