Cahangir Əsgərovun qızının Nyu-Yorkda 7,5 milyon dollarlıq əmlak aldığı bildirilir
AZAL-ın keçmiş prezidenti Cahangir Əsgərovun qızı Məlahət (Mila) Əsgərovanın bu il iyunun 30-da ABŞ-ın Nyu-York şəhərində 7,5 milyon dollar dəyərində əmlak aldığı bildirilir.
Bu barədə jurnalist Cavanşir Həsənli sosial şəbəkə hesabında məlumat yayıb.
Jurnalistin məlumatına görə, alınan əmlak Manhettenin Çelsi rayonunda, 543 West 25th Street ünvanında yerləşən iki kommersiya obyektindən ibarətdir.
Bildirilib ki, əmlak M.Əsgərovanın sahibi olduğu “MRCRI Prop” LLC vasitəsilə alınıb. Satıcı “Marlborough Gallery” ilə əlaqəli “Marlborough Real Estate” LLC şirkəti olub.
Obyektlərin ümumi sahəsinin 434,6 kvadratmetr olduğu qeyd edilib.
C.Həsənlinin yazdığına görə, əmlakın biznes məqsədilə, ehtimal ki, “Gazelli Art House” üçün istifadə olunması nəzərdə tutulur.
Qeyd edək ki, təqdim olunan məlumat jurnalist Cavanşir Həsənlinin sosial şəbəkə paylaşımına əsaslanır.
