Böyük Britaniya Fransa tərəfindən Aralıq dənizində Rusiya neft tankerinin saxlanılması əməliyyatında iştirak etdiyini rəsmən təsdiqləyib. Bu barədə ölkənin müdafiə naziri Con Hili Sky News telekanalına açıqlamasında bildirib.
Nazirin sözlərinə görə, Britaniyanın dəstəyi tanker Cəbəllütariq boğazından keçərkən HMS Dagger hərbi gəmisinin monitorinqi ilə ifadə olunub. Con Hili qeyd edib ki, müttəfiqlərlə birgə “kölgə donanması” adlandırılan gəmilərə qarşı tədbirlər gücləndirilir.
“Biz müttəfiqlərimizlə birlikdə qanunsuz şəkildə Putinin Ukraynaya müdaxiləsini maliyyələşdirən vəsait axınlarının qarşısını almaq üçün kölgə gəmilərinə qarşı reaksiyanı sərtləşdiririk”, – deyə britaniyalı nazir vurğulayıb.
Xatırladaq ki, yanvarın 22-də Fransa Prezidenti Emmanuel Makron Aralıq dənizində Fransa Hərbi Dəniz Qüvvələrinin Rusiyadan gələn neft tankerini saxladığını açıqlamışdı. Onun sözlərinə görə, əməliyyat beynəlxalq sanksiyaların pozulması şübhələri əsasında, neytral sularda və müttəfiqlərin dəstəyi ilə həyata keçirilib. Tanker marşrutunu dəyişməyə məcbur edilib. Makron bu addımın Ukraynadakı hərbi əməliyyatların maliyyələşdirilməsində rol oynadığı iddia edilən “kölgə donanması”na qarşı yönəldiyini bildirib