Sentyabrın 17-18-də Bakıda “Baku ID 2026” innovasiya festivalı keçiriləcək.

SABAH.HUB İnnovasiya Mərkəzinin təşkilatçılığı ilə baş tutacaq tədbir bu il ilk dəfə “SABAH.city” innovasiya şəhərciyində keçiriləcək.

Festivalın əsas məqsədi sənaye, elm, dövlət və kapital sektorlarını vahid innovasiya mühitində bir araya gətirməkdir. İki günlük proqram çərçivəsində texnologiya və biznes sahələrinin gələcəyinə dair əsas tendensiyalar müzakirə ediləcək.

Tədbirdə süni intellekt, vençur kapitalı, mələk investisiyaları, maliyyə texnologiyaları, səhiyyə, təhsil, yaşıl texnologiyalar və əmlak texnologiyaları üzrə panel müzakirələrinin keçirilməsi planlaşdırılır. Proqrama həmçinin startap təqdimatları və şəbəkələşmə sessiyaları daxildir.

Yerli və xarici startaplar hazırladıqları həlləri müxtəlif ölkə və regionları təmsil edən investorların diqqətinə çatdıracaqlar. Tədbirdə bir sıra beynəlxalq vençur kapital fondlarının nümayəndələri də iştirak edəcək.

Məlumata görə, indiyədək beş dəfə keçirilən “Baku ID” 13 500-dən çox iştirakçını, 375 startapı və 140 tərəfdaşı bir araya gətirib. Festival startapların 5,5 milyon ABŞ dollarından çox birbaşa investisiya cəlb etməsinə imkan yaradıb.

Tədbirin strateji tərəfdaşları Elm və Təhsil Nazirliyi, “PAŞA Holding”, SOCAR və 4SİM-dir. İRİA və “TIMES” isə festivalın əsas tərəfdaşları sırasında yer alır.

Festival iştirakçıları üçün ödənişsiz servis avtobuslarının fəaliyyət göstərməsi nəzərdə tutulur. Eyni zamanda, “Bolt for Business”in tərəfdaşlığı ilə festival məkanına gediş və geri dönüş səfərlərinə 30 faiz güzəşt tətbiq ediləcək.

“Baku ID 2026” haqqında ətraflı məlumat və biletlər bakuid.com saytında təqdim olunur.