Gürcüstanda inflyasiya 5,6%-ə çatdı – hökumət səbəbləri açıqladı
Gürcüstanda inflyasiyanın sürətlənməsi bir sıra obyektiv amillərlə bağlıdır. Bunu ölkənin maliyyə nazirinin müavini Giorgi Kakauridze bildirib.
“Gürcüstan Milli Statistika Xidməti”nin məlumatına görə, avqust ayında illik inflyasiya 5,6%-ə yüksəlib. Halbuki ölkədə hədəf inflyasiya göstəricisi 3% təşkil edir.
Kakauridzenin sözlərinə görə, inflyasiyanın hədəfdən yüksək olmasının əsas səbəblərindən biri neftin qiymətinin əhəmiyyətli dərəcədə artmasıdır. Onun sözlərinə görə, bu bahalaşma sonradan digər məhsulların qiymətlərinə də təsir göstərib.
Bundan əlavə, kommunal xərclərin artması da ümumi inflyasiyanın yüksəlməsinə səbəb olub.
Nazir müavini bildirib ki, hökumətin proqnozlarına əsasən, inflyasiya cari ilin sonuna doğru tədricən azalaraq təxminən 5% səviyyəsinə düşəcək. 2027-ci ildə isə bu göstəricinin daha da aşağı enəcəyi gözlənilir.
Kakauridze qeyd edib ki, inflyasiyanın əhali üçün mənfi təsirləri iqtisadi artım hesabına müəyyən qədər kompensasiya olunur. İqtisadi artım gəlirlərin də yüksəlməsinə imkan verir.
O əlavə edib ki, hazırda inflyasiya 3%-lik hədəfi aşsa da, gələn il yenidən bu səviyyəyə qayıtmalıdır.
Kakauridzenin sözlərinə görə, iqtisadi artımın da hazırkı yüksək tempdə uzun müddət davam etməsi gözlənilmir və zamanla təxminən 5,5% təşkil edən təbii səviyyəsinə qayıdacaq.
