Eyni karta pul yatırırsan, amma əlavə faiz ödəyirsən
Bank müştərilərinin qarşılaşdığı, lakin çoxlarının diqqət yetirmədiyi məsələlərdən biri də karta nağd pul yatırılarkən tətbiq olunan komissiyalardır. Xüsusilə bankın özünə məxsus ödəniş aparatından deyil, digər ödəniş terminallarından istifadə edən müştərilər üçün bu məsələ əlavə xərc yarada bilər.
Məsələ ondadır ki, müştəri öz bank kartını artırmaq üçün terminal vasitəsilə müəyyən məbləğ ödəyir. Lakin müəyyən edilmiş limit keçildikdən sonra yatırılan vəsaitə əlavə komissiya tətbiq olunur. Nəticədə müştərinin karta ödədiyi məbləğlə hesabına faktiki daxil olan vəsait arasında fərq yaranır.
Burada əsas sual isə belədir: müştəri bu limit və komissiya barədə kifayət qədər aydın məlumatlandırılırmı?
Əgər vətəndaş terminal qarşısında karta pul yatırarkən hansı məbləğdən sonra komissiyanın tətbiq ediləcəyini əvvəlcədən dəqiq görmürsə, sonradan hesabdan əlavə vəsait tutulması narazılığa səbəb ola bilər. Çünki müştəri üçün əsas məntiq sadədir: banka məxsus karta pul yatırılırsa, niyə istifadə olunan terminaldan asılı olaraq əlavə xərc yaranmalıdır?
Təbii ki, ödəniş terminallarının xidmət haqqı və bankların müəyyən etdiyi komissiyalar müxtəlif ola bilər. Lakin məsələ yalnız komissiyanın tutulmasında deyil, onun müştəriyə necə və nə dərəcədə şəffaf təqdim edilməsindədir.
ABB-nin aşağıdakı cədvəldə müxtəlif məbləğlər üzrə tətbiq olunan komissiyalar diqqət çəkir. Rəqəmlər göstərir ki, müəyyən həddə qədər ödəniş zamanı problem yaşanmasa da, limit keçildikdən sonra müştərinin ödədiyi əlavə məbləğ artır.
Bu isə bank xidmətlərində şəffaflıq məsələsini yenidən gündəmə gətirir. Müştəri əməliyyatı təsdiqləməzdən əvvəl “bu məbləği ödəyəcəksiniz, hesabınıza isə bu qədər vəsait daxil olacaq” prinsipi ilə tam məlumatlandırılmalıdır.
Çünki söhbət böyük məbləğlərdən getməsə belə, minlərlə müştərinin hər birindən tutulan kiçik komissiyalar ümumi hesabda kifayət qədər ciddi rəqəm yarada bilər.
Bank xidmətlərinin rəqəmsallaşdığı və nağd ödənişlərin müxtəlif kanallar vasitəsilə həyata keçirildiyi bir dövrdə müştərinin bilməli olduğu əsas məsələ sadədir: nə qədər ödəyirəm, nə qədər pul karta daxil olur və bunun nə qədəri komissiyadır?
Bu üç sualın cavabı əməliyyat zamanı açıq və anlaşılır şəkildə göstərilməlidir. Əks halda “limit”, “komissiya” və “əlavə xidmət haqqı” kimi anlayışlar müştəri üçün gözlənilməz xərcə çevrilə bilər.
Məsələ bankların komissiya tətbiq edib-etməməsində yox, müştərinin bu komissiya barədə əvvəlcədən tam məlumatlandırılmasındadır.
