Rusiyada yükdaşıma qaydaları dəyişir: yeni tələblər sentyabrın 1-dən qüvvədə olacaq
Rusiyada yük daşımaları ilə bağlı yeni qaydalar sentyabrın 1-dən qüvvəyə minəcək. Dəyişikliklər, xüsusilə, xarici daşıyıcılara da şamil olunacaq.
Rusiya Nəqliyyat Nazirliyinin məlumatına görə, yeni qaydalar çərçivəsində xarici daşıyıcıların sərhəddən keçidinə nəzarət gücləndiriləcək, təhlükəli yüklərin daşınması üçün xüsusi icazələrin verilməsi qaydası və tez xarab olan məhsulların daşınması ilə bağlı sənədləşmə proseduru dəyişdiriləcək.
Xarici daşıyıcıların Rusiyaya girişinə ödənilməmiş cərimələri, ödənişli yollardan istifadə üzrə borcları və ya ağırçəkili nəqliyyat vasitələrinin yollara vurduğu ziyana görə ödənilməmiş öhdəlikləri olduğu halda icazə verilməyə bilər. Borc tam ödənildikdən sonra girişə qoyulan məhdudiyyət aradan qaldırılacaq. Bu sahədə nəzarəti Rusiyanın Federal Gömrük Xidməti həyata keçirəcək.
Təhlükəli yüklərin daşınması üçün xüsusi icazələrin verilməsi ilə bağlı yeni prosedur tətbiq olunacaq və müvafiq reyestr yaradılacaq. Təhlükəli yükün daşınacağı marşrut yol sahibləri ilə razılaşdırılmalı, ayrı-ayrı ərazilərdə tətbiq edilən müvəqqəti məhdudiyyət və hərəkət qadağaları nəzərə alınmalıdır.
Rusiya daşıyıcıları üçün isə sənədləşmə proseduru sadələşdiriləcək. Yük avtomobilinin qeydiyyat şəhadətnaməsinin elektron surətini ərizəyə əlavə etmək tələbi ləğv olunacaq. Sistem operatorları bu məlumatları avtomatik şəkildə yoxlayacaqlar.
Bundan başqa, tez xarab olan məhsulların daşınması üçün tələb olunan SPS şəhadətnaməsinin (tez xarab olan ərzaq məhsullarının daşınmasına dair uyğunluq sənədi) elektron formada “Gosuslugi” portalı vasitəsilə rəsmiləşdirilməsi mümkün olacaq.
Beləliklə, sentyabrın 1-dən Rusiyada yükdaşıma sektorunda həm nəzarət mexanizmləri sərtləşdiriləcək, həm də yerli daşıyıcılar üçün bir sıra inzibati prosedurlar elektronlaşdırılaraq sadələşdiriləcək.
