Ermənistan və İran nümayəndələri ikitərəfli iqtisadi əməkdaşlığın inkişafını, həmçinin dizel yanacağı və qazın uzunmüddətli tədarükü perspektivlərini müzakirə ediblər.

Ermənistanın iqtisadiyyat naziri Gevorq Papoyan və İranın Ermənistandakı səfiri Xəlil Şirğolami görüş zamanı dizel yanacağı və mayeləşdirilmiş qazın tədarükü imkanlarını nəzərdən keçiriblər. Bu barədə Ermənistan KİV-i ölkənin İqtisadiyyat Nazirliyinə istinadən məlumat yayıb.

Görüşdə Ermənistan-İran iqtisadi əlaqələrinin inkişafı, qarşılıqlı ticarət dövriyyəsinin artırılması, investisiyaların cəlb edilməsi, birgə infrastrukturun və biznes əlaqələrinin gücləndirilməsi məsələləri ətraflı müzakirə olunub.

Ermənistanın iqtisadiyyat naziri ölkə məhsullarının İran bazarında iştirakının genişləndirilməsi məsələsinə də toxunub. Papoyan Avrasiya İqtisadi İttifaqı (Aİİ) ilə İran arasında azad ticarət sazişinin yaratdığı imkanlardan daha səmərəli istifadə edilməsinin vacibliyini vurğulayıb.

Danışıqlarda enerji və İran-Ermənistan arasında logistika məsələlərinə xüsusi diqqət ayrılıb. Tərəfdaşlığın daha da dərinləşdirilməsi məqsədilə Papoyan birgə istehsal sahəsində əməkdaşlığın genişləndirilməsini və sərhəd-gömrük prosedurlarının təkmilləşdirilməsini təklif edib.