Daşkənddə IV Özbəkistan–Azərbaycan Regionlararası Forumu keçirilib. Tədbirdə iki ölkə arasında iqtisadi əlaqələrin genişləndirilməsi, yeni investisiya imkanlarının yaradılması və birgə layihələrin həyata keçirilməsi müzakirə olunub.

Forumda hər iki ölkədən dövlət qurumlarının nümayəndələri ilə yanaşı, müxtəlif iqtisadi sahələri təmsil edən 400-ə yaxın şirkət iştirak edib. Sənaye, maşınqayırma, metallurgiya, tikinti, kənd təsərrüfatı, qida, turizm, tibb, əczaçılıq, mühəndislik, kimya, avtomobil və digər sektorlar üzrə əməkdaşlıq imkanları diqqət mərkəzində olub.

Azərbaycanın iqtisadiyyat naziri Mikayıl Cabbarov bildirib ki, dövlət başçılarının siyasi iradəsi Azərbaycan–Özbəkistan münasibətlərinin sürətli inkişafına mühüm təkan verib. Onun sözlərinə görə, iqtisadi tərəfdaşlığın genişləndirilməsi üçün həm ölkələr, həm də regionlar və şəhərlər səviyyəsində böyük imkanlar mövcuddur.

Forumda Orta Dəhlizin iki ölkə arasında iqtisadi əlaqələrin əsas istiqamətlərindən biri olduğu vurğulanıb. Dəhlizin yalnız tranzit marşrutu deyil, əlavə dəyərin yaradıldığı iqtisadi platformaya çevrilməsi üçün dəmir yolu və dəniz daşımalarının əlaqələndirilməsi, tariflərin optimallaşdırılması və rəqəmsal məlumat mübadiləsinin genişləndirilməsinin vacibliyi qeyd edilib.

Qarabağ və Şərqi Zəngəzur da özəl sektor üçün yeni investisiya məkanı kimi təqdim olunub. Bu ərazilərdə yaradılan infrastruktur və dövlət tərəfindən tətbiq olunan investisiya təşviqlərinin xarici investorlar üçün əlverişli imkanlar yaratdığı bildirilib.

Özbəkistanın investisiyalar, sənaye və ticarət naziri Laziz Kudratov iki ölkə arasında ticarət və investisiya əlaqələrinin daha da artırılması, regionlararası biznes münasibətlərinin gücləndirilməsi və birgə layihələrin reallaşdırılması üçün geniş potensialın olduğunu diqqətə çatdırıb.

Forum çərçivəsində enerji, maliyyə, infrastruktur, tikinti və istehsal daxil olmaqla bir sıra prioritet istiqamətlər üzrə əməkdaşlığa dair sənədlər mübadilə edilib. Bu sənədlərin biznes əlaqələrinin möhkəmləndirilməsinə və yeni birgə layihələrin həyata keçirilməsinə töhfə verəcəyi gözlənilir.

Tədbir iki ölkənin işgüzar dairələri arasında ikitərəfli görüşlərlə davam edib.