Qazaxıstanın “Kazatomprom” şirkəti Rusiyanın “Rosatom” dövlət korporasiyasının tərkibinə daxil olan Uranium One şirkəti ilə təbii uranın tədarükü, həmçinin uran yataqlarının birgə kəşfiyyatı və işlənməsi ilə bağlı razılaşma əldə edib.

Qazaxıstanın uranın, nadir metalların və atom elektrik stansiyaları üçün nüvə yanacağının idxal-ixracı üzrə milli operatoru olan “Kazatomprom” şirkəti Uranium One ilə U3O8 formasında təbii uranın tədarükünə dair müqavilə bağlanacağını açıqlayıb.

Şirkətin məlumatına görə, söhbət “Kazatomprom”un maraqlı tərəf olduğu iri sövdələşmədən gedir.

Bundan başqa, “Kazatomprom” Çində fəaliyyət göstərən atom elektrik stansiyaları üçün nüvə uranı və yanacaq tədarükü ilə məşğul olan State Nuclear Uranium Resource Development Company Ltd şirkəti ilə də iri sövdələşmə bağlandığını bildirib.

Qeyd edək ki, “Kazatomprom” strateji xammalın hasilatını yalnız Qazaxıstan ərazisində həyata keçirir. Şirkətin uran ehtiyatlarının həcmi təxminən 300 min ton təşkil edir və “Kazatomprom” dünya üzrə təbii uran istehsalının 40 faizindən çoxunu təmin etməklə sektorda lider mövqeyini qoruyur.