Son üç ildən artıq müddətdə Kənd Təsərrüfatı Nazirliyinin fəaliyyətinin nəticələri ciddi müzakirə mövzusuna çevrilib. Rəsmi statistik göstəricələr strateji əhəmiyyət daşıyan bir sıra məhsulların istehsalında azalma olduğunu göstərir. Bu dövrdə buğda istehsalı 117,8 min ton, kartof istehsalı 154,1 min ton, tərəvəz istehsalı 53,9 min ton, bostan məhsulları 600 ton azalıb. Eyni zamanda bal istehsalı 36,4 faiz, barama istehsalı 45,3 faiz geriləyib, tütün istehsalı isə bir neçə dəfə aşağı düşüb. Bununla yanaşı, ərzaq məhsullarının qiymətləri əhəmiyyətli dərəcədə artıb, idxaldan asılılıq isə daha da güclənib.
Bu statistika fonunda cəmiyyət haqlı olaraq cavab gözləyir: bu geriləmənin əsas səbəbləri nədir? Niyə məsul şəxslərdən bu nəticələrlə bağlı açıq və konkret izahat tələb olunmur? Kənd təsərrüfatı ölkənin ərzaq təhlükəsizliyinin əsas sütunlarından biridir və burada baş verən hər bir geriləmə milyonlarla vətəndaşa təsir edir.
Nazirlik isə gələcək hədəflərdən, 2030-cu ilə dair planlardan danışır. Ancaq mövcud problemlər həll edilmədən uzunmüddətli hədəflərin nə dərəcədə real olduğu barədə suallar yaranır. Aqrar sahə dərin peşəkar bilik, praktik təcrübə və çevik idarəetmə tələb edən mürəkkəb sektordur. Bu sahədə qəbul edilən qərarlar elmi əsaslara və real vəziyyətin düzgün təhlilinə söykənməlidir.
İtirilən hər mövsüm kənd təsərrüfatı üçün geri qaytarılması çətin olan vaxt deməkdir. Mövcud problemlərin vaxtında aradan qaldırılmaması həm daxili istehsala, həm də ölkənin ərzaq təhlükəsizliyinə mənfi təsir göstərə bilər. Cəmiyyət isə statistik rəqəmlərlə yanaşı, bu geriləmənin səbəbləri və vəziyyətdən çıxış yolları barədə də aydın cavablar gözləyir.