Dünya Bankının “Qlobal İqtisadi Perspektivlər” (Global Economic Prospects, January 2026) yanvar buraxılışı dərc olunub. İqtisadi İslahatların Təhlili və Kommunikasiya Mərkəzinin (İİTKM) İqtisadi təhlil şöbəsinin müdir müavini Rəşad Nəcəfli bildirib ki, qlobal iqtisadiyyat artan ticarət məhdudiyyətlərinə və tariflərə baxmayaraq gözləniləndən daha dayanıqlı inkişaf göstərir, lakin mövcud artım tempi uzunmüddətli və inklüziv inkişaf üçün kifayət etmir.
Hesabata görə, qlobal ÜDM artımı 2025-ci ildə 2,7%-dən 2026-cı ildə 2,6%-a enəcək, 2027-ci ildə isə yenidən 2,7%-ə qalxacağı proqnozlaşdırılır. 2026-cı il üçün proqnoz əvvəlki (iyun) qiymətləndirmələrlə müqayisədə 0,2 faiz bəndi artırılıb, 2025-ci il üzrə artım isə əvvəlki proqnozlardan 0,4 faiz bəndi yüksək olub.
Dünya Bankı hesab edir ki, bu müsbət koreksiya əsasən ABŞ iqtisadiyyatının gözləniləndən daha güclü inkişafı ilə bağlıdır. ABŞ üçün ÜDM artımı 2026-cı ildə 2,2%, 2025-ci ildə isə 2,1% proqnozlaşdırılır ki, bu da əvvəlki qiymətləndirmələrdən müvafiq olaraq 0,2 və 0,5 faiz bəndi yüksəkdir. 2025-ci ilin əvvəlində tariflərin təsiri ilə idxalın sürətləndirilməsi ABŞ iqtisadi artımına müəyyən mənfi təsir göstərsə də, 2026-cı ildə vergi təşviqlərinin genişləndirilməsi iqtisadi fəallığı dəstəkləyəcək. Bununla belə, tariflərin investisiya və istehlaka mənfi təsiri hələ də qalmaqdadır.
Hesabatda qeyd olunur ki, inkişaf etməkdə olan və inkişaf edən ölkələrdə iqtisadi artım 2025-ci ildə 4,2%-dən 2026-cı ildə 4,0%-ə enəcək. Çin istisna olmaqla, bu ölkələr qrupu üzrə artım həm 2025-ci, həm də 2026-cı ildə 3,7% səviyyəsində qalacaq. Çin iqtisadiyyatında artım 2025-ci ildə 4,9%-dən 2026-cı ildə 4,4%-ə enəcək, lakin fiskal stimulların genişləndirilməsi və ABŞ-dan kənar bazarlara ixracın artması səbəbindən əvvəlki qiymətləndirmələrlə müqayisədə 0,4 faiz bəndi daha yüksək proqnoz verilib.
Avrozonada iqtisadi artım 2026-cı ildə 2025-ci ildəki 1,4%-dən 0,9%-ə düşəcək, lakin 2027-ci ildə müdafiə xərclərinin artması fonunda 1,2%-ə yüksəlməsi gözlənilir. Yaponiya üçün isə 2026-cı ildə artım 0,8% (2025-ci ildə 1,3%) proqnozlaşdırılır, 2027-ci ildə isə artımın 0,8% səviyyəsində qalacağı bildirilir ki, bunun əsas səbəbi istehlak və investisiyaların zəifləməsidir.
Rəşad Nəcəfli vurğulayıb ki, mövcud qlobal iqtisadi mənzərə xüsusilə inkişaf etməkdə olan ölkələr üçün struktur islahatları sürətləndirməyi, investisiya mühitini yaxşılaşdırmağı və məhsuldarlığı artırmağı prioritet etməyi tələb edir. Yalnız bu yolla orta və uzunmüddətli dövrdə dayanıqlı və inklüziv iqtisadi artıma nail olmaq mümkündür.
Bütün proqnoz göstəricilər Dünya Bankının rəsmi hesabatının statistik əlavələrinə əsaslanır.
Urbaninfo.az