ABB Özbəkistan bank sektorunda mühüm satınalma həyata keçirib. Bank ölkənin maliyyə qurumlarından biri olan “Davr” bankının səhmlərinin 51%-ni əldə edərək nəzarət paketinə sahib olub. Sövdələşmənin dəyərinin 100 milyon ABŞ dolları olduğu bildirilir.
Razılaşmadan sonra bank fəaliyyətini yeni “ABB-Davr” brendi altında davam etdirəcək. Bu addım ABB-nin regional genişlənmə strategiyasının bir hissəsi kimi qiymətləndirilir və bankın Mərkəzi Asiya bazarında mövqelərini gücləndirməsinə xidmət edəcək.
Maliyyə sektorunda baş tutan bu satınalma həm ABB-nin beynəlxalq fəaliyyət imkanlarını artırır, həm də Özbəkistan bank bazarında rəqabətin daha da güclənəcəyinə işarə edir. Ekspertlərin fikrincə, ABB-Davr yaxın dövrdə rəqəmsal bankçılıq, korporativ maliyyələşmə və pərakəndə xidmətlər istiqamətində daha aktiv mövqe tuta bilər.
Qeyd edək ki, son illərdə Özbəkistan iqtisadiyyatında aparılan liberallaşma siyasəti xarici investorların bank sektoruna marağını artırıb. ABB-nin bu addımı da regionda Azərbaycan kapitalının iştirakını genişləndirən ən iri maliyyə əməliyyatlarından biri hesab olunur.

Məqalədə iqtisadçı jurnalist Rəhim Tarıverdinin sosial media hesabındakı fikirlərindən istifadə edilib.