Rumıniya Paralimpiya Komitəsinin rəhbəri Eduard Novak ölkə nümayəndələrinin Rusiyanın milli simvollarla iştirakına görə İtaliyada keçiriləcək Paralimpiya Oyunlarının açılış mərasimini boykot edəcəyi barədə yayılan məlumatları təkzib edib.
Bu barədə Agerpres agentliyi məlumat yayıb.
Novak bildirib ki, bu məlumatın haradan yayıldığını anlamır: “Bu xəbərin haradan çıxdığını bilmirəm. Başqa bir ölkənin xarici işlər nazirinin Rumıniya adından danışdığını xatırlamıram. İndi bu cürdür? Xeyr, bizə bu lazım deyil. Rumıniya Paralimpiya Oyunlarının açılış mərasimində iki idmançımızla təmsil olunacaq”.
Qeyd edək ki, martın 4-də Ukraynanın xarici işlər naziri Andrey Sibiqa Rumıniyanın Paralimpiadanın açılış mərasimini boykot edəcəyini bildirmişdi.
Xatırladaq ki, Beynəlxalq Paralimpiya Komitəsi 2025-ci ilin sentyabrında Rusiya və Belarusa tətbiq edilən sanksiyaları ləğv edərək onların yarışlarda iştirakına yenidən icazə verib. 2025-ci il sentyabrın 26–27-də Seulda keçirilən Baş Assambleyada təşkilat üzvləri Rusiya Paralimpiya Komitəsinin üzvlüyünün tam dayandırılmasına qarşı səs veriblər.
İtaliyanın Milan və Kortina-d’Ampezzo şəhərlərində keçiriləcək 2026 Qış Paralimpiya Oyunları martın 6-dan 15-dək davam edəcək.