“Qarabağ”ın Premyer Liqa oyununa azarkeş marağı aşağı olub – FOTO
Misli Premyer Liqasının VI turunda “Qarabağ” və “Şəfa” komandaları üz-üzə gəlir.
Tofiq Bəhramov adına Respublika Stadionunda keçirilən qarşılaşmada tribunaların böyük hissəsi boş qalıb. Hazırda davam edən matçı stadiondan izləyən azarkeşlərin sayının 300 nəfərdən az olduğu müşahidə edilir.
Bu mənzərə “Qarabağ”ın avrokuboklardakı oyunları zamanı yaşanan azarkeş izdihamı ilə kəskin şəkildə fərqlənir.
Ağdam klubunun beynəlxalq görüşlərində 31 mindən çox tamaşaçı tutumuna malik stadionda anşlaq yaşanır. Biletlərin qısa müddətdə tükəndiyi həmin qarşılaşmalarda tribunalarda böyük azarkeş kütləsi müşahidə olunur.
Premyer Liqanın cari turunda isə komandanın daxili çempionatdakı oyununa marağın xeyli aşağı olması diqqət çəkib. Bu hal Azərbaycan futbolunda yerli çempionat oyunlarına azarkeş davamiyyəti məsələsini bir daha gündəmə gətirib.
