Azərbaycanın 16 cüdoçusu sentyabrın 11-13-də Macarıstanın paytaxtı Budapeştdə keçiriləcək “Böyük Dəbilqə” turnirində mübarizə aparacaq.

Azərbaycan Cüdo Federasiyasından verilən məlumata görə, milli komandanın heyətində 12 kişi və 4 qadın cüdoçu yer alıb.

Turnirdə qadınlar arasında Könül Əliyeva (48 kq), Aydan Vəliyeva (52 kq), Südabə Ağayeva (70 kq) və Madina Kaisionova (+78 kq) çıxış edəcək.

Kişilərdən Murad Muradlı, Babarəhim Mirzəyev (60 kq), Rəşad Yelkiyev, Nizami İmranov (66 kq), Kamran Süleymanov, Rəşid Məmmədəliyev (73 kq), Hidayət Heydərov, Vüsal Qələndərzadə (81 kq), Vüqar Talıbov (90 kq), Əjdər Bağırov (100 kq), Camal Qamzatxanov və Kənan Nəsibov (+100 kq) qüvvələrini sınayacaqlar.

Los-Anceles-2028 Yay Olimpiya Oyunlarına lisenziya xalları verən yarışda 70 ölkədən 500-dən çox idmançının iştirakı nəzərdə tutulur.

Dünya Cüdo Turunun yarışında Azərbaycanı A kateqoriyalı beynəlxalq hakim Nazim Umbayev də təmsil edəcək.